May 10 khan TNT dintu Pu Sangthankima'n vantlang tan hna a thawh that avangin India rama chawimawina sang a dawng a, kum thum chhunga a vawi khat nan a hmunah a naute inkhel a en. LPS Arena, Falkland-ah champion lai TNT an talbuai hmasa a, set hnihna atangin Vanlaltanchhana leh Sadrak Fanai chuan team chawi kangin, 21-25, 25-14, 25-14, 25-16-a an chak rualin an hotupa tan Padma Shri an lawmsak. Vawi nga an khelhah a tum thum nan TNT an chak a, league an zawh rualin pathumna ni chungin an tlang. Trophy humhim turin chona hautak an hmachhawn zui a ngai dawn a, semifinal-ah league-a pahnih (Tuichangral emaw Huthar emaw) nen an intawng ang. Pro Volleyball-a an tel hmasak berah Hlimenin harsatna tawk zui zelin, vawi li an khelh tawhah tlawm vekin point an la hmu lo va. May 20 zanah league khar nan Chhinga Veng Spikers nen inkhel dawn mah se knockout round thleng pha lovin an tla fel tawh a ni. Inkhairual takin TNT an inlan a, Valbuanga'n tum 19 vaw tlain point kua a paih a, a vawi khat nan Kuriz Player of the Match lawmman a dawng. Sadrak Fanai chuan tum khat chiah tisualin point 11 a hlawh a, K Zodingliana, Zosangzuala (Lalmama) leh Vanlalchhantluanga Sailo chuan point kua theuh hmuin point thum, li leh nga an hloh. Team paruk inel zinga Mizo hlang ve ve an intawng a, a vawi khat nan chak thei turin Hlimenin bul an tan tha a; Valbuanga vuak an dansak hnuah PC Lalnuntluanga'n a hlap tla a, Zodinga vuak dang lehin 21-14-in hma an hruai. 24-21-a sang zawk an nih laiin veikhawr Rozuala Hnamte chuan Hlimenin set an lak theih nan a vaw tla a, an inkhelh chhungin point 12 a hmuh chanve hlohin team tana thawh hlawk ber a ni. TNT-in a nawmsamloh avangin Laldinchhunga an hmang thei lo va, set an hloh hnuah insiam remin insawrbing leh zualin an kir leh. Set hnihna tir atangin thil awm dan an tidanglam a, Rozuala vuak an dansak hnuah Valbuanga'n a hlap tla a, 10-1-in hma an hruai. Awlsam taka set an lak hnuah nuam ti takin an khel zui a, set thumnaah Sadraka leh Chhantluanga'n hlap tla zawnin 24-11-in TNT an sang a, Hlimenin point thum hmuh belh mah se set hmasa ang bawkin 14-ah an tawp. Set linaah Valbuanga'n vaw tla zawnin 13-5-in TNT an sang. A hnuah Sadraka'n hlap tlain Lalmama'n a hui tla bawk a, Hlimen spiker-ten chhang let thei lovin Nuntluanga leh Rozuala'n an vaw kai lo ve ve a, 23-16 a nih hnuah Lalmama'n point a hmu zawn a ni. TNT-in hlim taka hnehna an lawm laiin set lina laihawlah thlak ngaiin setter Lalliankima a inhliam a, damdawi in panpui a dinhmun a tha vak lo va, a khel zui thei ang em tih a chiang lo Hlimen player-ten inelna sangah tawn hriat an tlakchham bakah an theihna a sang tawh lo deuh a, Zolungmuana'n tum 10 hlap tlain tum li a tisual a, Nuntluanga'n point 11 a hmuh zat chiah hlohin a paih hnem a, Joseph Lalbiaksanga'n tum sarih vaw tlain point nga a hloh bawk. STATS TNT Vanlalṭanchhana : point hmuh 19, point hloh 9 Sadrak Fanai : point hmuh 11, point hloh 1 K Zodingliana : point hmuh 9, point hloh 3 Zosangzuala : point hmuh 9, point hloh 4 Vanlalchhantluanga Sailo : point hmuh 9, point hloh 5 HLIMEN Rozuala Hnamte : point hmuh 12, point hloh 6 Zolungmuana : point hmuh 10, point hloh 4 PC Lalnuntluanga : point hmuh 11, point hloh 11 Joseph Lalbiaksanga : point hmuh 7, point hloh 5 Vanlalnunzira (setter) : point hmuh 4, point hloh 3 H Lalchhuanawma : point hmuh 3, point hloh 2 Vanlalthlamuanpuia : point hmuh 3, point hloh 3 POINT TABLE TUICHANGRAL : Play 4, Won 3, Loss 1, Point 10 HUNTHAR : Play 3, Won 3, Loss 0, Point 9 THUTAK NUNPUITU TEAM : Play 5, Won 3, Loss 2, Point 9 DURTLANG NORTH : Play 4, Won 2, Loss 2, Point 5 CHHINGA VENG SPIKERS : Play 4, Won 1, Loss 3, Point 3 HLIMEN : Play 4, Won 0, Loss 3, Point 0 FIXTURE May 18, inrinni 8:00pm : HUNTHAR V TUICHANGRAL (mipa) May 20, thawhtanni 8:00pm : HLIMEN V CHHINGA VENG SPIKERS (mipa) May 21, thawhlehni 8:00pm : DURTLANG NORTH V HUNTHAR (mipa)