June 12, 2022 : BJP hruaitu, Nupur Sharma-i’n Prophet Muhammad-a a sawihnawmna duh lohna kal zelah tharum thawhna thlengah Ranchi khawpuiah chuan mi pahnih thiin mi 20 chuangin hliam an tuar.

Rajendra Institute of Medical Sciences-a thuneitute chuan police leh lungawi lohna lantirtute an innawr chiam hnuah ruang pahnih an dawn thu an sawi.

Hliam tuar mi 22 zinga 10 chu police an ni a. Hliam zinga pathum chu an dinhmun a tha vak lo bawk.

Jharkhand khawpui hmun tam tak chu Zirtawpnia lungawi lohna lantirtute leh police innawr avangin curfew puan a ni a. Mipuiin Sharma-i man an phut.

Zirtawpniah khan lunga police an tawng hnuah hnawh darh nan police-in van lam hawiin silaiu an hmet puak.

Ranchi-a Main Road-ah chuan mi tam tak pungkhawmin Sharma-i leh Delhi BJP-a media unit chief thin, Naveen Jindal-a duh lohna an aupui a. Jindal-a hi an party-in an hnawt chhuak tawh.

Thil duhawm lo thleng zel tur ven nan venhim hna thawktu tam tak dah an ni a, khawpuia dawr tam tak chu lungawi lohna lantir nan khar a la ni bawk.

Jharkhand khawpuia Sharma-i thu sawi duh lohna lantira tharum thawhna a thlen mek lai hian ram chhung hmun dang dangah pawh BJP hruaitu leh a thusawi dodalna hi nasa takin Zirtawpnia Muslim tawngtai zawh atangin lantir a ni a. State pakua velah liantham taka inhawr khawmna a awm a ni.

Nupur Sharma - Muslim ramte nena India inkungkaihna thlenga buai vek thei dinhmuna India dahtu, Muslim-te huat rawn ni mek, Sharma-i hi kum 37 mi, dan hre mi a ni.

A nihna atanga chawlh lailawktir a nih hmaa BJP thupuangtu a nih lai khan zan tin TV-a thil sawihonaah Prime Minister Narendra Modi-a sorkar aiawha dingin sawiseltute laka chhana thu sawitu a ni.

Delhi University atanga dan zir chhuak hian kum 2008 atang khan politics luhchilhin Hindu nationalist Rashtriya Swayamsevak Sangh movement hnuaia zirlai pawl, Akhil Bharatiya Vidyarthi Parishad (ABVP)-ah president atan thlan tlin a ni.

London School of Economics-ah international business law-ah masters degree a zir zawm lehin India-a a haw leh hnu lawk, kum 2011 atang khan thuk lehzualin politics-ah hian a inhmang ta a ni.

Kum 2013-a Delhi assembly inthlan lai khan BJP media committee-ah telin a mi hnial thiam, mi ngaihdan paih thla thiam leh awihawm taka sawi thiam a nih bakah Hindi leh saptawnga duhtawka a sawi theihna avangin hriat a hlawh hle.

Kum hnih hnua inthlan lehah BJP chuan Delhi Chief Minister Arvind Kejriwal an khintir ta hial a ni. Tumahin a chak an rin loh ang ngeiin a chak lo va; mahse, a campaign thiam em avangin kum 2020 khan Delhi BJP chuan an thupuangtu-ah an dah ta a. A hnuah phei chuan ‘national spokesperson’ a ni ta hial a ni.