Aizawl August 21, 2023 : BJP Mizoram chuan vawiin khan BJP State Office, Mipui Rûn, Upper Republic ah Karthar inhlanna leh Political Session an nei a, he huna thusawitu Vanlalhmuaka, State President chuan Lal Thanhawla thusawi thin chu Mizoram mipuiin awih sela chuan ramin a thatpui tawh hle dawn niin a sawi.

Vanlalhmuaka chuan, "Mizorama Sorkarna lo chelh tawh Pu Lal Thanhawla chuan Central-a Sorkar apiang hi State ah kan Sorkar tir a ngai a ni tih a sawi hi a sawi dik in, Central Sorkar lai chu State Sorkar-ah an pawimawh thu a sawi thin chu, vawiin ah hian Pu Hawla thusawi hi Mizoram mipui pawh hian awih ni ila chuan kan thatpui tawh hle tur a ni," a ti.

"Pu Hawla thusawi hi thenawm State-te chuan an lo awih a, an lo rin bawk avangin vawiin ah chuan NE States-ah Congress Party-te chuan BJP an zawm ta dual dual a, chumi avang chuan thenawm state-ah chuan Central Blessing dawngin Development nasa takin a thleng ta a ni. Chutiang chiah chuan Pu Hawla kaihhruai Congress Party khan BJP kha lo zawm dial se chuan Mizoram ah hian nasa takin Development kan hmu anga, mi retheite'n lei rem kan rap ve tawh ngei tur a ni," a ti.