Aizawl: MNF Adviser J.Malsawmzuala Vanchhawng chuan, “Hun harsa ber hripui leng leh buaina dang tam tak kan hmachhawn laia mipuite ei leh bar leh ni tin khawsak mamawha harsa lutuk lova min hruai chhuaktu kan Chief Minister Zoramthanga ho ngeiin kuminah sawrkarna kan siam leh ngei ang tih ring ang u,” a ti.

Zirtawpni khan Serchhip West Block MNF huaihawtin Thenzawla Vantawng YMA Run, Thenzawl Bazar Vengah Block, Unit leh Frontal bakah media department nen joint meeting an nei a, hun hmanpuitu J.Malsawmzuala Vanchhawng, Adviser MNF General Headquarters chuan thu sawiin, “Ni 937 awh hripui tlin taka min paltlangpuitu MNF sawrkar hi Pathian leh mipuiin hun tha an pe leh ngei ang,” a ti.

MNF Adviser J. Sawma chuan, “Zoram mipuite tana thawk turin MNF party hi Pathianin kum 60 zet a hruai tawh a, tun ministry kallaiah kum 4 pumhlum zan tawhah pawh kan minister-te leh MLA te eirukna leh hlemhletnaah hmingchhia an la awm lova, kan party President, chief minister zahawm tak Zoramthanga chungah tuanin finfiahna awm lovin, rinthu leh zeldin thu hmangin eptu party ten nasa takin an bei mek a, mipui rilru a ni lo zawnga hruai kawi an tum a ni,” a ti bawk.