ZALEN August 16, 2023 : Nimin August 15, 2023 kha Pachhunga University College Foundation Day vawi 65 na a ni. Kum 65 tlin lawmna hi vawiin August 16 hian an college seminar Hall-ah  an hmang a, Mizoram University Registrar Prof. Lalnundanga chuan khuallin niin a hmanpui. Home pali hnenah cheng sing ruk theuh an hlan.

Chief Guest Prof. Lalnudanga chuan PUC-in hlawhtlinna a lo neih tawh te chu fakin, hmabak an la neih te huaisen taka hmachhawn a pawimawh zia a sawi. "Hlawhtlinna tam tak kan lo hmu tawh, eng nge hma kan sawn leh na tur?," a ti. Kalkhawm te chu inpekna leh tumruhna a awm loh chuan hlawhtlinna a awm loh thu a hrilh a, tumna sang zawk neia hmachhawn zel turin a fuih. 

College Principal Prof. H. Lalthanzara chuan kal khawm te lawmna thu a sawi bakah he college chanchin leh an hlawhtlinna hrang hrang te a sawi. Principal hian he ni puala siam Souvenir bag a tlangzarh nghal bawk.

PUC social media team te chuan 'PUC over the years' tih video chu kalkhawm te en theih turin an chhawpchhuak a. College music club chuan an college anthem 'We will strive till we succed' tih hla an rem bawk.

He ni bik, college foundation day pual hian zirlai te leh zirtirtu te bakah thawktu dang te thawhkhawm Cheng 2,40,000 chu charity atan an hlan a, Aizawl-a home thlan bik te hnenah pek a ni. 
1) Gan Sabra, Luangmual, Rs. 60,000
2) Muanna In, Mualpui, Rs. 60,000
3) Hermon Children’s Home, Rs. 60,000
4) Bethsaida Home, Rs. 60,000

Dr. Henry Lalmawizuala, HoD, English Department, chuan charity hlanna hi a kaihruai a, college Principal hlui Dr. Tawnenga chuan sawm anih angin thu a sawi a, staff te inkara inlungrualna chu thil pawimawh tak a ni a ti a, an inpekna leh an lungrualna chu hlawhtlinna an neih theih chhan leh an chakna a nih thu a sawi. , Pachhunga University College Vice-Principal H.S. Lalsangpuia chuan lawmthu a sawi a ni.