Aizawl June 8, 2023: Pachhunga University College (PUC), chuan vawiin khan NIRF Ranking-a India ram pum huapa college tha ber 34-na nihna a hauh avangin lawmna hun a huaihawt a. NIRF Ranking 34th lawmna denchhen hian ni 2 awh tur, International Symposium on " Sustaining Nature & Tribal Worldview: An ecocritical approach to Literature" a buatsaih. He hun hi Governor Dr Hari Babu Kambhampati, Chief Rector, MZU ni bawk chuan khuallian niin a hmanpui.

Governor Dr Hari Babu Kambhampati chuan PUC hlawhtlinna chu Mizoram tana inchhuanna tham a ni tih sawiin, He dinhmun thleng tura theihtawp chhuahtu te hnenah lawmpuina a hlan. PUC-in hlawhtlinna lawmna atan International Seminar an huaihawt chu thil remchang tak a ni tiin Symposium buatsaihtu English Department, PUC leh he Symposium a tel zawng zawng te hlawk taka hun hmang turin duhsakna a hlan nghal bawk.

Governor chuan, Pachhunga University College chuan hlawhtlinna lian tham thawk chhuak turin theihtawp a chhuah bakah a thawktu – zirtirtu leh office hnathawk te bakah zirlai ten an theihna sang ber a hlan thin nia a lo hriat thu a sawi a. Thil tum chiang taka nei chunga hmalam an pan theih zel phawt chuan hun reiloteah PUC chu India rama College tha filawr a la nih theih a rin thu a sawi a. Deemed University dinhmun pawh an la hlawhchhuah a beiseiawm hle a ti. National Education Policy 2020 hmathlir anga PUC hi a kal zel a nih chuan Teaching intensive and Research intensive university a la nih thuai a rin thu a sawi bawk a ni.

Pachhunga University College (PUC) hi Mizorama college  zinga upa ber leh hmun nei tha ber a ngaih a ni a. PUC ram hi Acre 122 laia zau a ni. Tunah hian Arts, Science, Commerce leh Management Streams ah te zirna kalpui mek niin department 23 a awm a, zirlai 3000 chuang an nei mek. NAAC in CGPA of 3.47 out of 4 rating peiin A+ grade College a ni mek.