Aizawl: Labour, Employment, Skill Development & Entrepreneurship Department buatsaih PÛM-2022, Innovation Competition & Exhibition Fair chu Zirtawpni khan Govt. ITI Campus Aizawl-ah LESDE Minister Lalchhandama Ralte in a khar.

Minister Lalchhandama Ralte chuan Covid buai vanglai pawha hna thulh lova kut hnathawktute hnenah Welfare Board kaltlanga tanpuina sem anih thu a sawi a. Khawvel ram changkangte chu kut themthiamna lama sang an nih zel angin India ram pawn helam kawnga ke a pen nasat thu a sawi a. Hemi kawngah hian ITI-a zirlaite pawh sawrkar hna ringawta innghat lova an kut themthiamna chu eizawnna tlaka hmang tangkai turin a fuih a, "Mizoram thalai kut themthiamna leh mahnia thiam thil hmanga eiawnna kawng zawh tum te tan LESDE Department chu engtik lai pawhin a in hawng reng a ni," a ti. 

Kharna programme kaihruaitu Lalramsanga Sailo, Secretary, LESDE Deptt. chuan Department hmalakna hrang hrang leh hlawhtlinna hmuh thenkhatte a tarlang a, tunlai khawvelah mahni kutkawih eizawnna chawikan zel chu Department thil tum anih thu a tarlang bawk. LESDE Deptt. Director Angela Zothanpuii chuan PÛM-2022 intihsiakna leh Exhibition Fair buatsaih dan a sawi a, he Innovation Fair-ah hian Engineering Category-ah mi 25 leh Non-engineering Category-ah mi 39, an vain mi 64 te bakah sawmbik mi 11 ten exhibition-ah hian mipuite tlawh theih turin stall an hawn thu a sawi a ni.