Aizawl: MZP leh Planning & Programme Implementation Department tangkawp buatsaih MZP Inter College Quiz 2019-ah Govt. Aizawl College (GAC) chu pakhatna an ni.

MZP Inter College Quiz on Sustainable Development Goals 2019 final hi Zirtawpni zan khan Ignite Studio, Khatla ah a hmawrbawkna neih a ni a. He huna thusawitu Saihlira Principal Adviser cum Additional Secretary, Planning & Programme Implementation Department chuan, “He Quiz hi Sustainable Development kan hriatfiah lehzual nana thil pawimawh tak, khawvelin a mamawh mek kan hriat chianna atan leh zirlaiten ngaihtuahna thar an sen theihna tur atana buatsaih a ni a, MZP ten hetianga ruahmanna tha tak an siam hi a lawmawm hle. Sustainable Development Goals hi hlawkpui ila changkanna, hmasawnna rahbi thar thlen nan hman tum theuh ila, Mizo mipuiten he Sustainable Development Goals hmang hian hmasawnna rahbi thar kai theuh i tum ang u,” a ti.

Thusawitu dang MZP President L. Ramdinliana Renthlei, chuan, “Mizo zirlaite hian tan kan lak nasat a ngai a, Kohhran leh khawtlangah pawh lehkha kan zirlai chuan inhman dan tawk kan thiam a tul, mi hlawhtling kan nih hnuah kan ram tan leh kan khawtlang tan kan tangkai nasa zawk dawn a ni. Hnam dangte IAS/IPS an inziah tlin theih laiin keini kan tling thei lo hi kan inenlet a ngai a, hnam dangte tih theih ang hi chu kan ti ve thei a ni tih kan hriat a ngai a, ka thei ve a ni tih kan inpawm ngam a ngai a ni,” a ti.

MZP President chuan, “MZP hi kum 1935 a din a ni tawh a, kan dinchhante zingah ram leh hnam humhalh hi a tel a. Zofate hi hmun hrang hrangah awm darhin tawngte pawh a hrang nasa hle, tawng vanga unau kan ni lo a, thisen avanga unau kan ni zawk tih hi kan hriat thar a tha awm e, tumah in thliar hrang thei kan awm lo. Ram leh hnam humhalhna tha ber chu zirna hi a ni,” a ti bawk.

MZP Inter College Quiz 2019-ah hian Mizoram hmun hrang hrang atangin College 11 an tel a, quiz ah hian pakhatna Govt. Aizawl College (GAC), pahnihna Institute of Advance Studies in Education (IASE), pathumna Govt. Mizoram Law College (GMLC) te an ni. Pakhatna hian lawmman trophy, citation leh Rs 30000 an dawng a, pahnihna hian trophy, citation leh Rs. 20000/- an dawng a, pathumnain trophy, citation leh Rs. 10000 an dawng bawk a ni.