Aizawl June 12, 2022 : State palia Zirtawpnia Rajya Sabha member tur mi 16 thlanah BJP chuan state pathumah hnehna an chang a. Congress chuan Rajasthan-ah seat thum chang mah se Haryana-ah an che chhe hle.

Tun tum inthlanah hian inpawhna a nasa hle a, vote thlaktute zingah mahni party mi ni lo candidate vote pawh an awm nual a, inthlan kalphung bawhchhia pawh an awm nia sawi a ni.

Union minister pahnih, Nirmala Sitharaman leh Piyush Goyal bakah state minister Anil Bonde leh Dhananjay Mahadik te chu BJP-in rorelna in sang zawka thu tura an candidate zingah an tel.

Congress atangin Randeep Surjewala leh Jairam Ramesh te chuan Rajya Sabha-ah thutna chang dawn mah se union minister hlui, Ajay Maken erawh a tling zo lo.

Maharashtra-ah rorel lai zinga mi, Shiv Sena atanga ding Sanjay Raut, Sharad Pawar-a kaihhruai NCP atangin Praful Patel leh Congress candidate Imran Pratapgarhi te chuan eptu, BJP nena inbeihna nasa tak karah hnehna an chang a. Saffron party hian bial ruk inthlanah a zahve an la ve bawk.

Haryana-ah Congress an che chhia a. BJP candidate, Krishan Lal Panwar leh an party-in an thlawp, independent candidate Kartikeya Sharma te chuan bial hnih inthlanah hnehna an chang.

Congress hruaitu hlun, Maken chu a chak zo lo tihna a ni a, BJP-inpolitics bawlhhlawh tak an khelh vangah puh zuiin, “India-ah hian mipui rorelna hi a la awm em?” tiin Twitter-ah a tar lang.

Rajasthan-ah bial li inthlanah BJP-in an mi ni lo an vote karah Congress chuan bial thum an la a, BJP-in pakhat an chang ve bawk.

Karnataka-ah rorel lai, BJP chuan bial li inthlanah bial thum chuhin an tling vek a, Congress-in pakhat an chang ve bawk.

Chhim lam state-ah hian eptu party lian pahnih, Congress leh Janata Dal (Secular) chu an inbei nasa hle a. An mite zingah pawh an party mi ni lo vote pawh an awm nghe nghe.