ZALEN May 5, 2026 : Rajya Sabha MP K.Vanlalvena chuan nimin tlai khan Lianpui khua a pi pu sulhnu awmna Lungphun ropui a tlawh. K.Vanlalvena hi khawtlang hruaitu leh NGOs hruaitu ten Lungphun ropui hmunah an lo dawngsawng a, amah lo lawmna hun hman a ni.

K. Vanlalvena chuan hnamfing apiangin an pi leh pu te sulhnu an ngaisangin an humhalh thu sawiin, Lianpui khawtlangin pi leh pu te sulhnu an humhalh avangin lawmthu a sawi.

Lungphun ropui hi kum 2025 July ni 14 khan Archaelogical Survey of India chuan India rama hmun pawimawh National importance atan a puanga, National importance atana puan a nih theih nan K. Vanlalvena hian Parliament ah a lo auchhuahpui tawh a ni.

Lungphun ropui awmna Lianpui khua hi Zahmuaka thlah Palian Lal Lianpuia thlangthlakna hmasaber a ni a, a hming chawiin Lianpui tih a ni a, Duhlian tawng hmang ah chuan Mizorama khaw upa berte zinga mi a ni. Lianpui ramah hian pi leh pu te sulhnu tam tak a awm bakah Mizorama tlangsang zinga mi Zopuitlang pawh a awm bawk.