India ram rorelna in sang zawnga member ni mek 12% chu mi hausa tawntaw (billionaire) an ni a, Andhra Pradesh leh Telangana chu heng parliamentarian zinga mi hausa ngah ber an ni.

Association for Democratic Reforms (ADR) leh National Election Watch (NEW) ten MP tanglai 233 zinga 225-te thubuai neih dan, an sum neih leh an chanchin dang an zir chiang a. Rajya Sabha kal mekah hian seat khat a ruak.

Andhra Pradesh-in MP 11 an neih zinga a zahve dawn, panga (45%) leh Telengana-in pasarih an neih zinga pathum (43%) chu mi hausa tawntaw an ni.

Hetih lai hian Maharashtra chu mi hausa MP nei tlem ber an ni a, parliamentarian 19 an neih mek zinga mi pathum (16%) chauh billionaire an ni a. Delhi-ah pathum zinga pakhat (33%), Punjab-ah pasariha pahnih (29%), Haryana-in pangaa pakhat (20%) leh Madhya Pradesh-in 11 zinga pahnih (18%) te chu Rs. Vbc 100 chuang nei nia inchhalin MP an neih zinga mi hausa tawntaw nei tlem an ni.

Rajya Sabha member 225 en chik hmun thuma thena hmun khat (33%), mi 75 chuan an affidavit thehlutah thubuai an nei tih an tar lang bawk.

MP 41 (18%) chuan thubuai rip tak an nei a, pahnih phei chuan tualthah thubuai  an nei mek nghe nghe.

Rajya Sabha MP tang lai zinga pali chuan hmeichhe laka dan bawhchhiat thubuai an nei a. An zinga pakhat, Congress hruaitu hlun tak, Rajasthan MP K C Venugopal chuan pawngsual kaihhnawih thubuai (IPC section 376) a nei hial bawk.

Andhra Pradesh-in Rajya Sabha MP a neih 11 zinga panga (45%) zet leh Telengana-in pasarih a neih zinga pathum (43%) chu mi hausa tawntaw niin a ngah ber pahnih an ni.

Telangana-in MP pasarih a neihte thil neih hlut zawng chu Rs. vaibelchhe 5,596 zet a ni a, Andhra Pradesh MP 11-te thil neih chu Rs. vaibelchhe 3,823 lai a ni bawk.

India rama MP ngah ber, Uttar Pradesh atanga MP 30-te thil neih hlutna chu Rs. vaibelchhe 1,941 chauh a ni ve thung.