July 10; Tukin zing dar 6:00 vela Sihphira current-in a man hlum Manipur raltlan Lammuanthanga (39) nupui Nemngaihliani chuan thla 5 mi fa a pai tih hriat a ni a. Mitthi ruang hi CYMA Hall ah thlahna hun hman a nih hnuin CYMA morque van-in an awmna lam panpui a ni. 

Current in a man hlum tak Lammuanthanga (39) te chhungkua hi Kanan Veng, Lamka-a cheng niin Sihphir lamah inhlawhna a awm beiseiin an chhungkuaa tlan an ni a. Lammuanthanga hi Sihphira an awmna inchung pawp chu siam turin inchungah hian a lawn a, electric hruipui tawk palhin a boral ta a ni.

Vanduaina tawk, Pu Lammuanthang te chhungkua hian June thla tir lam khan an sa himna ngaihtuah leh eizawn tumin Mizoram an rawn lut a, Khawdungseiah thla khat vel awm phawtin, kar hmasa kar tir lam khan an hmelhriat raltlana Mizoram lo lut ve tho, Sihphir lama mi in luaha khawsa Pi Chingthianmuang te rawn belin Sihphir ah hian an rawn lut ve rawih a ni. Tukin zing khan Sihphir Kawnvenga mi In luah tur an hmuh chu a chung rangva pawp thawm tha turin inchungah a lawn a, Electric Current hrui lian a lo hnai si a, mita hmutu awm lovin vanduaina hi a thleng ta a ni. Damdawi In thlenpui a nih hmain a boral ta a ni.

 Lammuanthanga te hi an nupa leh chhungte dang nena Mizorama rawn tlan an ni a, fa an la nei loa a nupui leh a pai lai thla 5 mi hi a kalsan a ni. 

Vawiin 11:30 vel khan CYMA hall ah a ruang hi lain thlahna hun tawi hman a ni a, chumi hnuah an khaw pana phurh liam a ni.