November 22, 2022; Bangladesh Chittagong Hill Tracks a Bangladesh Sipai leh  Kuki-Chin National Army te inbeihna vanga an sahimna zawnga Lawngtlai District a Zohnahthlak raltlan rawn lutte chhawmdawlna atan Central YMA chuan Rs. 50,000 a hlan tawh a. Chief Minister Zoramthanga chuan an harsatna tawhte sukiang turin theihtawp chhuah a ni dawn a ti.

Central YMA president R. Lalnghetan ZALEN a hrilh danin, YMA chu harsatna tawk pui tur an nih angin, Lawngtlai district a Zohnahthlak raltlan rawn lutte chungchangah pawh a tul ang zelin hma an la dawn tih a sawi a. A tul a piang a an lo hman lailawk atan Central YMA chuan Rs. 50,000 a thawn phei tawh tih a sawi.

Hemi chungchangah hian Central YMA chuan thuchhuah siamin, sipai hlau a tlanchhia, ramhnuaia tangkhang mi engemawzah an la awm mek tih tarlangin, "Kan unau harsatna tawkte chhawmdawl an nih theih nan, sub headquarters YMA, group leh branch YMA te tan la tlang turin kan inngen a, Mizo mipuite pawh he harsatnain a tuam mek, kan unaute tana ke pen turin kan insawm a ni," tiin an thuchhuah ah chuan an tarlang.

Chief minister Zoramthanga chuan Parva lama kan Bawm unau za tel harsatna tawk mek te dinhmun ching fel turin Mizoram sawrkar in theihtawp a chhuah zel dawn tih a official Instagram page ah a tarlang a, Mizoram sawrkar hruaitute leh Central YMA hruaitute nen emergency meeting neiin, an harsatna tawh te sukiang turin theihtawp chhuah mek a nih thu a tarlang bawk.

ZORO hruaitute sawi danin, Bangladesh-a Zo hnahthlakte'n an sahim nan leh anmahni puala state pek an phut a, Kuki-Chin National Army (KNA) dinin, hma an la a ni. Tribal dangte lakah dodalna nasa tak an tawh hnuah, tun hnaiah Bangladesh sipaite'n anmahnia an beih ngam loh avangin Arakan Army (AA)-te nen inremna siamin, KNA-te chu Chaihkhiang khua leh a chhehvelah bei hoin, an kap a. 

Bangladesh sipai leh Arakan Army-te chuan civil mite pawh an dim lo a, nunaute pawh an nghaisa a, chuvang chuan Bangladesh-a Zo hnahthlakte chu an khuaah awm ngam loin an tlan darh mek. Hriat theih chinah Chaihkhiang khaw mi (civilian) pakua chu Arakan Army-in an man a, Bangladesh sipai hnenah an hlan rin a ni.

He thu ziahlai a hriat theih chin a Lawngtlai District chhung Parva khua a Zohnahthlak raltlan rawn lut mi 272 te hi khan Biakin leh Primary School ah riahtir an ni a. Mizoram police enkawlna/venhimna hnuaiah an awm tawh nia thudawn a ni.