Aizawl January 18, 2024: Fisheries Department chuan vawiin khan an Minister Lalthansanga hovin Directorate of Fisheries Conference Hall-ah infuihtharna hun an hmang a, minister hian thawktute chu ram damlo tidamtu ni ngei turin a sawm.

Fisheries Minister Lalthansanga chuan Sawrkar chu mipui awlsamna leh that tlan zawkna tura ding a nih thu a sawi a. Fisheries Department hnuaia thawktute chu dikna, rinawmna leh inpekna nena thahnemngai taka hna thawk theuh turin a chah a, ram damlo tidamtu ni ngei turin a sawm nghal bawk a. Kumina Department hmalakna tur hrang hrangte leh ngaih pawimawh tulte a sawi lang bawk.

Fisheries Department Director F. Vanlallawma chuan Department chanchin, hmalakna leh hmachhawp te sawiin, Fisheries Department chu kum 1993-ah Agriculture Department atanga in dangin District sawmpakhat-ah Office an neih thu a sawi a. Sangha dil nei mi 18,519 an awm thu leh Sangha thar chhuah pawh Metric ton 5,029 a nih thu a tarlang a. Mizoram-ah Sangha dil siam theihna ram Hectare 24,000-a zau a la awm thu a tarlang bawk.