Ukraine a rûn avanga ram dang tam takin an hrek mek laiin Russian oil-te chu tam zawkin India leh China-ah thawn a ni a, India pawhin Moscow atanga a lak luh tam ber lai a ni.

Chawlhkar khat liam ta chhung ringawt pawhin barrel maktaduai 74 atanga 79 vel zet ram pahnihah hian phurh luh a ni a, Russia-in Ukraine a run hma, February thlaa a thawn luh let aia tam a tling hman tih Kpler chuan a tar lang.

Thla hmasa khan Asia khawmualpui hian Europe khumin a vawi khat nan anni aiin Russia atangin tuialhthei a la lut tam zawk a, May-ah phei chuan a aia tam a lak luh a rinawm niin data & analytics company hian a sawi.

Russian tuialhthei thawn chhuahte hi tuipuia kalpui a ni ber a. Ukraine a rûn avanga United States, UK leh EU company tam takin  hnawlin Moscow pawhin Asia-ah a leitu tur a dap phah a. China leh India pen chhuak thuaiin man tlawm zawkin barrel maktaduai tel an chaw lut.

Singapore-a awm, Kpler-a senior oil analyst Jane Xie chuan, “Asia atanga leitute thenkhat hi chuan economics dinhmun atan ai mahin politics thil avanga lei an ni,” a ti.

Russian tuialtheite hi Asia-ah chuan India leh China ramin an lei hnem ber a, April kha an lak luh tam ber tum a ni a, hei hi India-in a lei tam zual vang niin Xie chuan a sawi.

May thlaah hian a hniam hret a rinawm thu a sawi a; mahse, thla hmasaa an lak luh tam ber chu a tluk thuak dawn tho niin a sawi.

Europe ramte hian pipeline hmanga an chawk luh thin laiin Asia-ah chuan lawnga phurh a ni a, lawnga phurh a pung nasa hle.  China, South Korea, Japan leh US pawhin an leisak nasa hle a, India leisak zat aia tam daih an leisak a ni.