Aizawl; Mizoram Presbyterian Kohhran, Synod Mission Board (SMB) hnuai a thawk missionary leh Baptist Church of Mizoram hnuaia ram pawna thawk zingah covid 19 vei mi 121 an awm tawh.

SMB hnuaia missionary leh an chhungte zingah Covid 19 hripui vei mi 119 awm tawhin, thi 1 a awm tawh a, enkawl dam mi 102 an awm tawh. SMB Secretary Rev. C. Zorammawia hnen atanga ZALEN thudawn danin, SMB missionary leh an chhungte zinga Covid 19 hripui vei awm tawh mi 119 zinga mi 61 te chu mipa niin, 58 te chu hmeichhia an ni a, tun dinhmun ah enkawl lai mi 16 an la awm.

Tun dinhmun a Covid 19 hri vei mek te chu Patna mission field ah mi 7, Jharkhand mission field ah mi 2 leh Assam mission field ah 2, Delhi mission field ah mi 3 leh Lucknow mission field ah mi 2 te an ni a, heng hri vei mek te tan a tawngtai turin SMB Secretary Rev. C.  Zorammawia chuan koh-hran hote a ngen.

BCM a AGS i/c Mission Rev. C. Vanlaldika pawh in tun a an hriat theih chinah rampawn a an missionary 1 in hri a vei mek thu leh rampawn a thawk Pastor zingah Covid 19 hripui vei an awm thu ZALEN a hrilh a, Pathian zarah ngaihtuahawm lutuk an awm lo ni a an hriat thu a sawi.