Aizawl : Inrinni khan Robert Romawia Royte, MNF Adviser leh Sports Minister chuan Hausiampa Hall, Haulawng-ah 'Lawhleng Sunday Newspaper' kum 21-na (nickel anniversary) lawmna a hmanpui a. Haulawnga khelmual tur hmunhma a tlawh bawk.

Anniversary khuallian Robert Romawia Royte chuan Lawhleng chanchinbu duhsakna a hlan a. Journalist-te intawiawmna leh inngaih pawimawhna ropui a tiin, "Ram tana an thawhna kawngah an inpekna a chhuanawm hle," a ti. Zoramthanga kaihhruai sawrkar chuan journalist-te a ngaih pawimawh dan leh hmachhawp a awm mek thute a sawi bawk.

Thu ziak kawngah neutral tur leh hleih nei lo turin journalist-te a chah a. India rama paper lian zingah political party-a tel tam tak an awm a, an thuziak a bias lo. Mizoramah pawh thu lai la (neutral & impartial) taka report ziak thin turin a chah a ni.

Social media-a thudik chanvein mipui rilru a hruai kawi dan sawiin Pu Robert Romawia Royte chuan Assembly House-a thil thleng atangin a sawifiah a. "House atanga opposition member chhuak lai 'bye bye' lar takah khan ruling lam chauh kan lang a, eptu lamin min 'bye bye' lai kha a lang ve tawh lo. Ruling lam min dem nasa a nih kha," a ti. "Source rintlak chauh ziak thin TV leh paper-ah erawh chuan khati zawng khan tumahin an ziak lo. Chuvangin news source a pawimawh hle. Mipuite pawhin hriatna dik atanga hriatna ngaih pawimawh a tul. Chanchinbu chhiar, TV en leh Radio ngaihthlak uar a, thudik hriat kan uar a ngai," a ti.

"India rama literate ber si Mizoram mipuiten social media atangin thu dik tawk lo kan buaipui nasa hi a tha lo. RNI registration (accountability leh responsibility) nei ngat atangin hriatna i la thar ang u. Kan thil hmuh kan forward zung zung hi hnam dangte tih ngai loh a ni," a ti. Robert-a hian Lawhleng editor Lalhmachhuana Ralte hnenah lawmpuina thilpek a pe bawk a ni.

Lawhleng Nickel Anniversary-ah hian khual zahawm C. Lalrambuatsaiha, MJA General Headquarters President pawhin thu a sawi a. Haulawng VCP Laltlanmawia Chhakchhuak, Lawhleng editor Lalhmachhuana Ralte leh Lunglei DIPRO C. Lalremruati-ten thutawi sawina hun an hmang bawk a. District hrang hrang atangin journalist thahnem tak an tel.

Haulawngah hian Robert Romawia leh MNF hruaitu pawimawhte chu Lunglei North Block-II Secretary inah inkawmkhawmna hun an nei bawk a. Lunglei North MLA Dr. Vanlaltanpuia hmalakna bawhzuiin Keitung Tlanga khelmual tura beisei hmunhma chu NGO leh khawtlang hotute nen an tlawh bawk a ni.