Aizawl: Environment & Forests Minister Lalrinmawia Ralte chuan, "Ramngaw humhalh ah harhna Mizoram in a mamawh a, kan inthlahdah chhunzawm zel chuan kan tu leh fa, mizo naupang lo la awmtur te hi thlaler nisa hnuaiah kan tah tir ang tih a hlauhawm a ni," a ti. Nimin PU College a World Forestry Day, 2015 hmanna ah he thu hi sawiin E&F Minister chuan Mizoram khaw hrang hrang ten an khaw chhehvela hmun hring awm tawh phawt mai tihchingpen tumna rilru an nei chuan a rilru a tina hle tih a sawi a,"Tuihna a tlem nachhan te, khua a lo lum zual nachhan te, sik leh sa mumal loh chhoh nachhan te hi ramngaw chereu nen a in zawm,” tih a sawi a. Minister chuan ramngaw humhalh chu hriat thar leh a ngai tak meuh a ul thu a sawi a. Mahni eizawnna leh nunna nena inzawm tlat ngaihhlut nachang pawh hre lo chu upa emaw rual u zawk an nih pawn neitu chan changtu tur zawk thangthar te chuan an khap ngam turah ka ngai a ni," a ti bawk. World Forestry Day hmanna hi PCCF & Principal Secretary Lal Ramthanga chuan a kaihruai a. Mithiamte hnen atangin ramngaw pawimawhna leh ramngaw chereu in sik leh sa, ei leh bar bakah mihring khawsak phung a nghawng dan an ngaithla a. He mi ni puala E&F Department in inelna chi hrang hrang a buatsaih taka lawmman dawngtute hnenah lawmman tangkafai leh chawimawina thuziak hlan an ni bawk.