August 16, 2023; Rampawn a hnathawk (house-maid) a awm Mizo nula engemawzahin harsatna nasa tak an tawk mek a, chung mite Mizoram a hruai haw tur chuan Mizoram BJP in hma an la mek.

Vawiin Aizawl press club a thuthar thehdarhtute a kawmna ah MBJP thupuangtu Lalremsangi Fanai chuan, state pawn leh ram danga eizawnna hlawk tur nia ngaiin, chhungkaw harsatna vang liau liauin, Awmpui Hna (House-maid) thawk turin ram chhung leh pawnah tam tak an kal leh tawh tih sawiin, tam tak an talbuai mek niin a sawi.

Tuna Dubai, Oman, Syria vela Mizo hmeichhia buaina tawk mekte tirtu leh kawhhmuhtu Dubai hmuna Agent te chu Burma mi-Zo hnahthlak an ni tih a sawi bawk.

"India Passport leh Visa nei lo, Work Visa nei lo, dan bawhchhe nghalin mi ramah kan lut a, kan intir lut a. Harsatna tawk thin ten anmahni pui turin National Party Mizoram BJP te min au fo thin," Lalremsangi Fanai chuan tiin, a tul ang a Home Ministry, External Affairs Ministry, India Embassy, Mizoram sorkar, DGP, DC te hnen a an thlen thu te a sawi. 

Central sawrkar, Mizoram sawrkar, Party leh mimal zarah mi engemaw zat chuan dam takin Mizoram an lo kir thei nia sawi bawkin, tuna harsatna tawk tam takte pawh an lo haw theih ngei an beisei thu leh anmahni leh an chhungte pawh thlamuang taka awm tur a chah.