ZALEN July 30, 2024; MNF, Serlui North Block chuan Assam in ramri an laih mek tih tawp tir turin Mizoram home minister an phut.

An thuchhuaha an tarlan danin, July ni 20, 2024 (Inrinni) khan MNF 6th Serlui North Block te chu Aitlang zaua kuthnathawktuten harsatna hrang hrang an tawh leh police duty dinhmun leh harsatna an tawh hrang hrang te a hmuna enfiahin an kal a.

Assam lam hian an police te awlsam leh nuam zawk a an inkalpawh zung zung theihna tura tan Vairengte Sabual muala Phirthanga leilet an laih leh J. Samuela huana JCB/Hitachi hmanga kawng an rawn lai thar nasa hle tih hmuhchhuah a ni.

July ni 29, 2024-a home minister zahawm takin thuthar thehdarhtute hmaah, kan sawrkar hnuah ramriah status quo bawhchhiatna thar a la awm lo niin kan hria tia a sawi chu pawi an tiin, Vairengte mipuite an rilru a na hle tih an tarlang.

"Mizoram home minister-in thuthar thehdarhtute hmaa status quo chhungah hma thar lakna a awm lo a tih hi nimin 29.7.2024 ngei pawh khan Assam sawrkar hian Vairengte Aitlangah kawng a la lai reng a ni tih home minister hian a hre lo der nge Mizoram sawrkar hriat ruk puiin Assam sawrkar hian kawng an lai tih hi MNF Serlui North Block te chuan kan zawhna a niin, kan home minister hian Zoram mipui hmaah dawt chiang taka a sawi avangin, ngaihdam dil turin kan phut a ni. Ramri venhim leh thuam chak turin kan sawrkar hian a ranglama hma laa Assam sawrkar in status quo chhunga an hmalakna hi tihtawp tir nghal turin kan ngen nghal bawk a ni," tiin an tarlang bawk.

Kan ram an laihchhiat vek tawh hnua Ni 9-10 August 2024 a Mizoram sawrkar leh Assam sawrkar te home secretary level-a remna kawng zawnga inbiak an tum mek chauh hi kan sawrkarin ramri a vei tawklohzia leh ralkhat atang chauha ramri vei sawrkar an nihzia a lantir ni-ah an ngai tih tarlang bawkin, "MNF sawrkar anga huaisen taka ramri humhalha hma la turin ZPM sawrkar hi kan ngen a, kuthnathawktute harsatna hrethiamtu mipui sawrkar nia an insawi ang ngeiin a taka chechhuak turin kan ngen nghal," an ti bawk.