Aizawl July 5, 2022 : Congress Thalai chuan Mizoram leh Assam ramri, motorin a luh theih lohnaa Aitlang, Sabual Zau-a IR duty te kal chilhin tui in tur case 30, ei tur leh filter te an camp-ah an zuk hlan. Aitlang, Sabual Zaua IR duty ten tui in tur an filter dan Vanglaini leh social media darh chu Congress Thalai chuan bawhzuiin, vawiin khan MPYCC Vice President Laltawnliana hovin an zuk tlawh a ni.

Congress Thalai Vice President Laltawnliana chuan IR duty te chu MPYCC ten an ngaihsakna lantir an duh thu a sawi a, "Kan ngaihsak che u a ni tih hi kan rawn ti lang duh a, thil ropui leh tam tak rawn thlen thei lo mah ila kan ram tana pasaltha rammu te hi kan hre reng che u tih kan rawn lantir a ni," a ti a.
"Keini hi sawrkar sawisel emaw, tu emaw dema rawn kal kan ni lo a, in dinhmun kan lo hriatin ngaihsak in ngai niin kan hria a, kan phak tawk chin chinah kan rawn ngaihsak che u a. Harsatna in tawk a nih pawhin theihtawp kan rawn chhuah ve zel dawn a, kan awm ve reng a ni. He laiah khaw lum leh hmunhma rem lo takah in duty a, in duty na pawh a hahthlak tih kan hria, mahse sawisel nei miah loa hetianga in duty hi fak in phu kan ti a ni," MPYCC Vice President Laltawnliana chuan a ti.

IR duty te hian harsatna lian tham tun dinhmunah an nei lo tih an lo sawi a, an tui in tur filter dan chu Chhattisgarh lamah pawh an lo tih thin dan a ni tih an lo hrilh.  Tui filter lai thlalak pawh anmahni vawrhdarh a nih loh thu leh tun dinhmunah chuan boruak a muanawm rih thu an lo sawi.