Aizawl : PRISM Party President chuan ramri chungchanga sorkar a duh khawp loh zia thuchhuah an siam a, “Chief Minister Zoramthanga'n ramri chinfel dan tur a hriat, a sawi duh si loh hi, tuna a lan dan chuan chinfel loha dah tawp, a dawih zawk chan chan reng niin a lang,” an ti.

Prism president Vanlalruata chuan, “Tun hnaia Assam Forest-in Mizoram chhunga office an hawn, mipuiin kan duh loh avangin buaina te pawh chhuak deuhthaw, a hnua nawrlet anih theih nana MZP-in kawngzawh an huaihawt a, Mizoram map an hal hial. Tun thleng hian Assam Forest chuan an office thar hi an luah a. A tira police venna hnuaia awm kha tunah phei chuan thlamuang takin ven lohin an awm tawh,” a ti. Ramri hauh kawnga sorkar chet dan a duh khawp loh thu sawiin, “He hmuna kan ram chhung lama hmana Police Outpost tur kan sorkarin a sak khan Assam lam chuan an rawn tichhia a. MZP in chawlhbuk an sak phei kha chu Assam lam tih-chhiat pawh nghak hman lovin keimahni police-te ngei kan sorkarin a tihchhiattir a ni,” a ti.

Tun hnaia Chief Minister Zoramthanga’n ramri chinfel dan tur an hriat thu sawi a, an tih dan tur tak a sawi duh loh chung-changah Ruata chuan, “Tuna a lan dan hi chuan ramri chinfel dan tur an hriat chu chinfel loh, chu mai pawh ni lovin nekna awm pawh dawh tawp a, tlawm zel mai niin a lang,” a ti. “PRISM Party chuan kan ram chin kan rama rinluh veka humhalh kan tum a. Tuna kan inchuh lai hi kan ram chhung, MLA Inthlana ‘kan sorkar chuan kan lalet ang’ kan tih kha a ni,” tiin, “Kan sorkar hunah chuan Assam lam chu an tawm tawk ang,” a ti bawk.

Sorkarin insiamthat a mamawh zia a sawi naah PRISM president chuan, “Cabinet Meeting-in tun hnaia innereline 1875 kha kan ramri a nih thu an pawm kha thil tul lo tawp a ni a. Tuna pawm thar ngai lovin kan ramri a ni sa a. Humhalh tura chet a ngai a ni. Kan ramri chin an sawi a, chumi awp tura chetchhuah chu sawi loh chumi tilang map pawh an tichhuak ngam lo a ni,” a ti a, PRISM Party chuan ram leh hnam humhalh ngam turin sorkar an duh tih an thuchhuah chuan a tarlang bawk.