Aizawl: Mizoram leh Assam ramri tlawh a zin ZPM Thalai Gen. Hqrs. hruaitu, Mizoram Police check gate thlanga 1st IR batallion awmna tlawhte chuan Mizoram sawrkar chu ramri ngaihtuah tawk lovah an puh a, thu ringawta sawi chu a tawk lo an tih thu thuchhuah siamin an tarlang.

1st IR Battallion awmna an tlawh tum hian duty lo awmte kawmna an nei niin an thuchhuah hian a tarlang a, duty tur mi 27-te hian tui mamawh khawp an hmuh loh thu an tarlang. Mizoram leh Assam lam atan intlantawnna Autorickshaw stand leh a bul hnaia awm (Assam lam mi) te in sak te chu a hmunah kalin an enfiah a. Helaia awm chhungkua-te hian Assam sawrkar hnen atangin phalna a neih thu an sawi laiin, document erawh hmuh tur an nei lo a, ruihtheih thil an zuar thin bawk nia thu an dawn thu an tar lang a ni.

Police Check gate ILP check-na hmun an tlawh atangin ILP pekchhuah dawnin Assam NRC nei lo pawh an pek an awm niin an sawi a, he helaia thawkten hian Assam NRC online-a hmuh tur a awm lo (bo) tak vang a nih thu an lo hrilh, niin an thuchhuah hian a tarlang.

ZPM Thalai president Malsawmzuala chuan, “He’ng kan thil hmuhte atang hian kan ram hruaituten Mizoram ramri chungchangah, Aizawl khawpui atangin venhimna tha taka kalpui a nih thu an sawi leh ringawt thin hi a veiawm hlein ka hria a. Ramri hi vawilehkhata chinfel chi a ni lo tih chu kan hre vek; mahse, Reserved Forest Area-a Mizoram lamin eng emaw an tih ve pawh a, sorkar thuneitute ngeiin a ni a an thiah/laksawn lai a, Assam lamin In te sa a, an duh duh zalen taka an rawn ti zar zar mai chu Mizo kan nihna ang pawhin a tlawm thlak ka ti a, Ramri vei ngam sorkar kan neih hi tul hle tawh a ni.

“ILP pekchhuahnaah Assam NRC tel lo pawh pekchhuah a ni chu tha lo kan ti a, sorkarin sawifiah se kan ti a ni,” a ti.