Khawvel pumah natna chi khat, Covid-19 (coronavirus) avangin kan buai a. He natna hi nikum December atangin China ram khawpui pakhat, Wuhan-ah intanin khawvelah a darh zau zel a. Thiamna lama sang tak tak Europe ramte mai bakah khawvel ram changkang leh thiltithei bera ngaih, USA pawh a buai ta hle. Khawvel thiamna sang tawh hle mah se tun thlengin he natna laka invenna leh tihdamna chu mi thiam ten an la hmuchhuak lo a. Ram changkang apiangin an tuar emaw tih mai tur a ni. He natna tihbaiawm tak avang hian mi sing tel an thi tawh a, eng angin nge khawvel hi a tihbuai zel ang tih hriatthiam a har ta hle.

India ram ngeiah he natna hi hmuh a niin ram changkang zawkte ai chuan ziaawm mah se ni tina kai/vei hmuh belh zel an ni a. Mi eng emaw zatin an thihpui tawh bawk a ni. Mizoramah pawh he hri vei hi mi pakhat hmuh a ni a, uluk takin State Referral Hospital, Falkawn-ah enkawl mek niin a dinhmun a ngaihtuahawm loh niin a enkawltu doctor-te chuan an sawi a, a lawmawm hle mai.

He hri avang hian mipui kan ralkhel a, kan himna ber nia hriat inkharkhip ‘lockdown’ chu India ram pumah kalpui mek a ni a, Mizoram phei chu India ram state dangte aiin kan lockdown hma zawk a ni. Mipuiten thu kan awih a, sawrkar leh local task force-te thu kan awih avangin fak pawh kan hlawh a. Tihluihna awm si lovah chuan lockdown hlawhtlinna ber state kan ni hial awm e. Kan thuawihna rah chu kan tel chho mek a, a tir lama ram dang atanga lo haw mi pakhatin hri a kai tih loh chu a vei hmuhchhuah belh an awm lo te hi a lawmawm a. Thu kan awih zel chuan he hri lakah hian Mizoram hi a him a beiseiawm hle.

Tuna kan harsatna leh hlauhawm ta ber mai chu kan thenawm ram atangin he hri hi a lo lut ang tih hi a ni. Kan hriat angin kan châk lakna ber, Assam-ah chuan hri vei mi eng emaw zat hmuh an ni tawh a, a then phei chu kan dep maia awm an ni. Hei mai bakah khawchhak lamah nise kan ramri bul mai, Myanmar-ah hmuh a ni bawk a; Tripura ah pawh hmuh a ni a, chuvangin, he hri hlauhawm tak hi kan kawngkaah a rawn dak zuau zuau tawh tihna a ni.

Covid-19 hri leng laka kan him theih nan ramri uluk taka ven chu kan tihmakmawh a ni ta. Sawrkar pawhin hemi kawngah hian nasa lehzuala hma a lak a ngai a, ramri-ah venghimtu police tam lehzual a dah loh chuan hri lenna hmun atang hian kan ramah an lo luh mai a hlauhawm hle. Hei mai bakah khua leh veng tinah local task force tha tak tak an awm bawk a, heng mite tha tichak tura an mamawh a ngaihtuah a pawimawh ta hle. Tuna kan mamawh leh tih tur hmasa ber chu mi dang an lo luh loh nan uluk leh zuala ramri ven hi niiin a lang.