India sorkarin Myanmar nena inrina hung a tumna kal mekah Mizoram chhimtawp lama chengte chuan ramri lui pahnih, Tiau leh Chhimtuipui chu ramri hung pawna dah an duh lo.

Sorkar laipui hian ramri hi hunga ram pahniha chengte km 16 huam chin visa tel lova inkalpawh theihna, Free Movement Regime (FMR) kalpui mek pawh tihtawp thuai a tum bawk.

Hemi chungchangah hian Mizoram chhim lama chengte chuan anmahni tlawhtu, Mizoram MP K. Vanlalvena hnenah luipui pahnih chu an tan a pawimawh avang leh tun hma atanga an lui ramvahna a nih avangin ramri hung pawna a awm chu an pawm thei dawn lo tih an lo hrilh.

Rajya Sabha MP hian zan thum riakin Nilaini kal ta atang khan Mizoram chhim lam, Myanmar ramri dep khaw thenkhatte a tlawh a. Khaw eng emaw zatah Indo-Myanmar ramri hung tumna awm mekin a nghawng theih turte zir chian pahin ramri depa chengte ngaihdan a zawt hlawm.

Mipui ngaihdan a zawhnaah ramri thui tak hi Tiau leh Chhimtuipui luite a nih avang leh hei hi hi pi pu atanga an lui ramvahna an nih avangin ramri pawna dah chu pawm theih a nih loh tur an lo hrilh a. MP hian sawrkar laipui hotute hnenah thlen ngei a tum thuin a chhang a ni.

India leh Myanmar inrina, km 1,643-a thui hung hna Union Home Minister Amit Shah chuan tun hnai khan tan thuai a nih tur thu a lo sawi tawh a. Mizorama NGO thenkhat chuan FMR tihtawp nen an duh lo va, hetih lai hian Chief Minister Lalduhoma chuan sorkar laipuiin a tih tlat chuan state sorkarin tih theih leh dan theihna a neih loh thu a lo sawi tawh bawk.