Aizawl January 22, 2024 : Vawiin khan Mizo Hnam Runah chhung inkhawm neih a ni a, he huna thusawitu Rajya Sabha MP K. Vanlalvena chuan tun inthlana hnehna an chan loh chhan chu Pathian ruat a ni a, Pathian thu loin tumah roreltu an awm ngailo a, Vawiin a roreltute hi pawm a ngai a, pawm loh vangin Pathian thu hi a danglam dawn lo, tiin, sawrkar lai chu ramri-ah nghet taka ding ve turin a chah.

Vena chuan kum 1972 atangin Mizoramin UT kan nei chho a, election vawi 8 kan hmachhawnah vawi 4 MNF-in hnehna kan chang tawh bawk, ZPM-in vawi 1. MNF leh Congress lal chhung zawng khan Pu Duha hi chu a bet ve ngat ngat thung a, ZPM sawrkar hi MNF zia takin kan lawmpui a, Pathianin rorelna chance a pe a, tha taka ro an rel theih nan kan tawngtaisak thin tur a ni, a ti.

K.Vena chuan, "Kan sawrkar lai khan hnam thilah te fiahna kan tawng fo mai a, mahse hnam thila fiahna kan tawnah khan kan tisual lo a. Manipur leh Myanmar atang pawhin kan tawng a, dik tak, tha takin kan paltlang a. Kum 5 chhung khan hnam thila fiahnaah kan chesual loin ka hria a, tun kan sawrkar thar pawh hian fiahna an han hmachhawn ve tan a. Central sawrkar chuan Myanmar border/inkalpawhna a km 16 ve ve zalen a khawsak theihna chu kan hung vek ang tiin thu an chhuah ta rup mai a. Kan sawrkar thar hi ka ngen duh chu MNF sawrkar nghet taka kan ding ang khan ramriah hian nghet takin ding ve rawh se, kan hnam kan chhan vanga hmasawnna turin a thuanawp dawn a nih pawhin hnam chhan nan ding zel turin ka chah duh a ni," a ti.

Vawiin a pawimawh thu sawiin, "Kan ram leh hnam thlavang kan hauh ngamloh chuan nakin zel atan a pawi dawn a. Tiau hi Mizoram ramriah kan pawm ve ngai dawn lova, hung pawh kan remti lo, an hung duh a nih chuan Tiau kam nilovin Chindwin luikamah han hung rawh se, tih hi ka sawi duh a, khimi thlenga an hung dawn lo anih chuan India sawrkar hian rawn hung suh se. Burma leh Mizoram inkar ramri hung chu Mizo mipui ten kan remti lo a ni," a ti bawk.