India rama tual chhung cricket inelna ngaihhlut ber, Ranji Trophy 2023-24-ah Mizoramin chak lovin bul an tan a, Sikkim lakah Thawhtanni khan wicket liin an tlawm.

Gokulbhai Somabhai Patel Stadium, Nadiad, Gujarat-a Zirtawpni atanga Plate Group inkhel hmasa ber tanah Sikkim hian vaw hmasain run 442 siamin mi pakua an thihah an duhtawk (declare) a. Sumit Singh-a’n century a siam bakah batter dang pali zetin half century an siam.

Mizoramin vaw vein Agni Chopra chuan run 166 zet thawh mah se mi dangin an pui tha lo va, run 214 chauh an tlin tihah an thi zo va. Mizoram batter panga zet run siam lovin an chhuak lehnghal a ni.

Mizoram hian a thawh hnih nan vuak chhunzawm nghalin Mohit Jangra chuan run 126 siamin Chopra-a’n run 92 nen thlawp tha viau mah se mi dangin an thlawp zo lo deuh va, thawh hmasa ai erawh chuan siam tamin run 397 an tlinah an thi zo.

Sikkim hian Mizoram tum hnih vuaka an run siam belhkhawm chu an vuak thawh khatnaa an siam zat atanga umin chak turin run 169 an mamawh a, mi paruk thiin an tlin ta a. An vuak thawh hnihnaah pawh hian Sumit bawk che tha berin run 76 a siam a, Ashish Thapa chuan run 60 tlinin a tawp thlengin a thi lo bawk.

Ranji Trophy khelh mekah hian Mizoram hi Plate Group-ah state/association dang panga nen an awmho va. Inkhel kualin a sang paliin semifinal an lut thei dawn.

An khelh hnihnaah Zirtawpni atang hian Nadiad-ah tho Nagaland an hmachhawn leh dawn a. Plate Group-ah hian Arunachal Pradesh, Hyderabad, Meghalaya, Nagaland leh Sikkim te a awmpui a ni.

Ranji Trophy hi Board of Control for Cricket (BCCI)-in state/association tana kum tin a buatsaih thin, first-class championship-ah chuan ngaihhlut hlawh ber a ni a, kum 1934 atang daih tawha khelh tan kha a ni.

Kuminah hian Elite-ah group paliah team pakua theuh awmin Mizoram leh mi dang panga hi Plate-ah an awm a. Plate-a final lut team hnih chu season tharah Elite-ah an kai sang dawn a, kumina Elite-a awm zinga a tichhe ber team hnihte chu Plate-ah an tlahniam ve thung ang.

Group stage inkhel hi thawh (innings) hnihin ni li chhunga khelh zawh tura ruahman a ni a. Knock-out stage atangin ni nga chhunga khelh a ni ang.