Aizawl July 23, 2024 : Vawiin khan B. Lalchhanzova, Supply Minister office-ah ZPM General Headquarters hruaitu thenkhat leh MZP hruaitu leh Mizo Convention (Youth Wing), Tripura aiawhte chuan Zomuantlang-a chengte Ration Card paihsak chungchang an sawi a, Tripura lama card neih an neih vang niin an hria.

ZPM thuchhuah chuan Zomuangtlang-a Ration Card neitute chungchang sawihona hunah hian 2022 atangin endikna neih a nih tawh thu sawichhuah a ni, an ti a, mitthi leh document fel lo te pawh paih anni nual tawh a, Zomuantlang-a chhungkaw 80 dawn paih anga mi thenkhatin an sawi chu a dik lo, an ti. "Ration card hi Computerised a nih tak avangin card hi neih double theih a ni lo a, Ration card paihsak tak chhungkaw 13 te hi Tripura lama card nei an ni a, Mizoram nen card a neih double theih tawh loh avangin paih an ni," an ti.

Hemi chungchangah hian Supply Minister hovin ZPM party hruaitute leh MZP hruaitute chuan a hmuna endik tura kal leh an tum a ni.

He hunah hian Supply Minister chuan Mizoram Chief Minister Lalduhoma hmalaknain Central sawrkar chuan Nuai 500 Mizorama khuarel chhiatna tuarte leh thenawm ram atanga Mizorama inhumhimna zawnga lo kal mihring 45000 vel ei tur, buhfai leina atan rawn pek a nih thu a sawi.

ZPM General Headquarter chuan Khuarel chhiatna tuarte leh raltlante Mizoram sawrkar-in a ngaihsak a, manganga awm te hi sawrkar hian a ngaihthah thei lo an ti a, anmahni chhawmdawl nan theihtawpin hma a lak zel beisei a, Mizoram sawrkar hmalakna chu ropui a tiin chhuanawm an tih thu an sawi ve bawk.