RAWMI – RAWTUAI Mizoram Indigenous Bamboo Shoots Thawn chhuah tham thar tum

zalenxhg - Jun 12, 2021

Rua/Mau hi kan hlawhtlinpui ang em?

F. Vanlalpeka,
IMCS Agribusiness Project
Aizawl, Mizoram

Mizoram hian Mau (Bamboo) chi (species) tam tak nei teuh mah ila, a bik taka luhchilh a, mumal tak leh thar chhuak tak tak tura luhchilh theih Rawmi tih loh chu kan lo nei reng reng hlei nem le! Mizoramin tun dinhmunah, mau a neih ang ang te hi ngun taka kan luhchilh pawhin, hlawkpui khawpa phur chhuak tur chuan ram pilril tak taka awm an ni a, phurh chhuahna tha leh senso tur nen a inmil thei lo. Mizoram chhunga hetia mau (Mautak, Phulrua, Raw-nal, Rawthing etc..) kan hmuh ho reng reng lah hi Mimal ram chhunga mi vek an ni tawh a. Mau hrim hrim duhin, zawng khawm dawn ta pawh ni ila, kan ruksak a nih ngawt loh chuan motor lian nena duh zat zat phurh vut vut tur khawp a awm lo. 

Hetiang chauh pawh ni lovin, mau rau rauvah pawh, a bik taka eizawnna tur bika luhchilh (Agribusiness) theih, eizawn nana a hlawkna tel hma theih ber tur, thingtlang lama lo neia eizawng mek te leh huan neia eizawng mekten an chhawr hma theih dan ber tur atan he Rawmi tih loh chu kan lo nei reng reng hleinem maw le! Mizoram mau Rawmi hi sawi nep emaw ngawt chi a ni lo. Khawvela mau lam mi thiamten Mizoram Rawmi (Dendrocalamus Sikkimensis) hi khawvela mau chi tam tak zinga an mit fu ber leh mau hmantlak ber 25 an thlan zinga tel phain, khawvela mau lian ber pathum inang vek (D.Asper, D. Brandasii, D.Sikkimensis) zinga la tel pha cheu a ni.

Mizoramah hian mau (Bamboo) hi kan sawi kan sawi thin a, a taka luhchilhtuten a tak veka eizawnna tura luhchilh tur hi chuan kan mi thiamte thurawn bawk hi a lo fing ber zel. Mau tha bik awm-na-reng a, eizawn nana mau tha leh pum lian zawk, hlawk zawk, a chingtu (farmer)-te luhchilh tlak zawk buaipui mai hi a fuh ber. Vawiin niah hian Mizoram tana mau hmanga ke kan pen ve dawn a nih rau rau chuan, Mizoram tualto mau (Mizoram Indigenous Bamboo) zinga Rawmi lo hi chu buaipui tur kan nei lo. “Chepa nge i duh Vahrit” ti ang vel kan ni. 

MIZORAM RAWMI – RAWTUAI KAN BUAIPUI CHHAN (Mizoram Indigenous Bamboo Shoots Project):  Mizoram hian kan leilung atanga kum tam tak chhung chawl lova THARCHHUAH (production) theih tur mumal tak kan neih ve tawh hi a tul a, chu tharchhuah chu SAWNGBAWL (processing) tlak leh rinngam, a HRALHNA (marketing) lam thlenga a chingtu (farmer)-te innghahna ngam a nih a tul bawk. Chu bakah, Mizoram tual chhung ringawt ni lo va, ram chhung leh ram pawn lam deng pha khawpa kumtin thlasik anga khel lova kum tam tak chhung a zawna deh chhuah theih chi item-ah chuan Mizoram RAWMI – RAWTUAI chiah hi Mizoram Mau zinga thlan theih awmchhun chu a ni.

KUT HNATHAWKTUTE TAN: Mizoram mipui tam ber (75%) hi leilung atanga thar chhuah theih nghenga eizawng kan ni a. Heng zinga 5 % tal hian he Rawm- Rawtuai hmang hian sum hai lut vein luhchilh ta se la, phun atanga kum 45 chhung a dam thei a, phun atanga kum 5 chhovah rawtuai hi a thar (harvest) theih a. Kum 40 chhung teh meuh chu kum tin rawtuai hralh tur chawl lova neih theih a ni ringawt pawh hi lo neitu leh huan neitute tan Mizoram Economic Deal a ni ringawt. Tunah hian IMCS Agribusiness Project member (Farmers) bakah, pa fing leh hmathlir thiam chinte chuan he Rawm-Rawtuai thar chhuah tumin, an mahni neih sum ngeiin he Rawmi tiak polypot hi an order a, an lei tan ta.

KUT HNATHAWKTUTE DUHSAK: Mizoram Rawmi-Rawtuai hian kum tam tak chhung mahni huan/lo hmunah ngei sum hailuh theihna a siam a; chuvangin, kut hnathawktuten an mahni sum seng lova hetiang sumhnar an neih theihna tur hi Government of India chuan National Bamboo Mission (NBM) hmangin states-ah sum a pe thin. Hei vang hian, he sum hi Mizoramah pawh kut hnathawktute zinga mau chingtute hi a taka duhsak an tul hle. Thil dang tam tak pawh sorkar department chuan a lo chintir tawh thin a; nimahsela, mau a nih tak avanga kut hnathawktute hnena pe lo tura department hnena lo zualko thin awm lo turah ngai ila. Mizoram hi kut hnathawka eizawngtute inhmangaih siakna state a nih hi. MLA inthlan dawn chauhva kut hnathawktute kan hmangaih a nih chuan a vanduaithlak hle dawn a ni! Kut hnathawktute hian thil hi an chhui thiam vet teh a nia.

KUT HNATHAWKTUTE CHAW BEL: He leilung atang lo hi chuan kut hnathawktute tan innghahna dang a awm lo. Chuvangin, kan huan, kan lo atanga thahrui senga thar chhuah ve tur kan neihte hi chu ram hruaitute hian min dappui char char thei se. Mizoramah hian buh hmun ringawt hmanga eizawn hi chu kan tlin tawh hlawl lo a ni. Hei vang tak hian kut hnathawktute hian sum chang thei tur leh kan tharchhuah ve tur phei hi chu, kan sorkar leh kan politician-ho te hi chuan min dan pinsak duh khawpa rilru sual nei lo turah kan lo ngai e. Chuti ni lo va, kut hnathawktute chaw bel ben persak zawnga ke pentu ram hruaitu inti an awm chuan a vanduaithlak hle dawn a ni. Kut hnathawktute hian politics ball ang maia min ngai thintute hi kan lo chhinchhiah ve thlap thin.

MIZORAM TUALTO RAWMI HI A HLU HLE: Mizoramah hian mahni ram tualto zinga ram hmasawnna thlen thei thil humhalh duh mi ram hruaitu an pawimawh tak zet a. Rawmi ngei pawh hi Mizoram tualto dik tak (Mizoram Indigenous Bamboo) a ni a, ram dang atanga mau dang chawk luh kan helh em em si avangin kan hlutsak hle turah ngai la. Chuti ni lo va, tuten emaw mau an buaipui avanga mahni tualto mau tha em em pawh kan sawi chhe leh lawi si a nih chuan, ram hruai hnaah mi te rinngam kan ni lo tawp ang.

Share now