GreenRocketTV film puitling hmasa ber 'Rawng Chawhpawlh' chu nizan September 19, 2023 khan Vanapa Hall-ah tlangzarh a ni ta. Vanapa Hall-ah mipui thahnem tak an pungkhawm a, hmuhnawm an titlang hle.   

He film hi GreenRocketTV ten YouTube lama an tihchhuah thin 'Chhungkaw Chhehchawl' behchhana siam a ni a, en man hla tak a ni. 'Thaibawih' star Ruthi Chenkual chuan, "Tun hnai Mizo film ka en tawh zawng zawngah chuan hmuhnawm ka la tiber," tiin a sawi hial. 

Mizo ten film director kan neih that zinga mi Mike pawhin, "Mizo film ka en tawhah chuan a tha ka tiber anga ka tihial, 10-ah 9 lai ka pe e," tiin a sawi a, mipuite chu en ve theuh turin a sawm nghal bawk. 

Rawng Chawhpawlh film-ah hian - Tommy Rosangliana, Zoparmawii, Lalduhawmi, Lalchhandami, Thangbiakzuala, Zorammawia bakah, tawn hriat nei tha tak tak Maruata Hnamte, Eddie Tochhawng, Maruata Rawite, Rosangpuii Ralte, Vanlalawmpuia, Zomuansangi te an in lan a ni. 

September 22 zan hian - Vaivakawn, Chanmari leh Serchhip Auditorium bakah Saikuti Hall, Lunglei-ah te show a ni leh dawn a, September 23 zan atangin Lersia Play-ah en theih a ni ang.