Aizawl: Comptroller & Auditor General of India report chuan Rural Development Department hnuaia hnathawh zawh tawha sawi 4-te chu thawh tan chauh a ni a, hei mai bakah thawh zawh tawha sawi 4-te chu zawh an la ni lo a ni tiin he thilah hian FIR thehluh a, Vigilance department-in chhui chian nise tiin rawtna an siam.
Tunhnai session a pharh tak CAG report tarlan danin Rural Development Department hnuaia Border Area Develoopment Programme hnathawh dan bik te Champhai leh Lungsen Block an enfiahnaah he thil hi an hmuchhuak niin a tarlang a. Report chuan kum 2016-17 chhunga Champhai leh Lungsen RD Block hnuaia cheng nuai 20 senna hna 4-te chu zawh tawh anga tarlan a ni a; mahse, enfiahnaah chuan hna an tan dawn chauh tih hmuh chhuah a ni tih a tarlang a. Hetiang deuh bawk hian heng Block pahnih a cheng nuai 92 senna hna 4 chu zo tawh anga tarlan a ni nachungin enfiahnaah chuan thawh mek a ni tih an hmuchhuak tih a tarlang.
CAG report chuan enfiahna an neih hun chhung kum 2012-2017 inkar khan vbc. 4.42 senna nia sawi hna chi hrang hrang 60 te chu an hnathawh leh sum hmandan a rinhlelhawm hle niin a tarlang a. Kum 2012-17 chhunga Champhai leh Lungsen BDO ten kawng laihna atana excavator leh truck an hman te number an chhuichianna ah excavator (JCB) leh truck nia an sawi te hi auto rickshaw, scooter, bike leh car te a lo ni tiin hmun hrang 67-a hnathawhna atan hengah hian vbc.3.15 sen ral a ni tih a tarlang a. Lirthei an hman thenkhat phei chu hmun hnih hmun thumah a rualin hna thawk niin a tarlang bawk.
CAG report-in thil dik lo a tarlan dangte chu - BADP sum lo kalte hi pek chhuah nghal tur a nih laiin hren khawtlai a ni a, Block 2-a hnathawhna atangin Mizoram Building & Other Construction Welfare Board ah labour cess nuai 31 dah tur chu dah a ni lo, BADP hnathawhnaah signboard siam vek tur a nih laiin hnathawh 73 zinga 35-ah dah a ni lo.