Aizawl: Rural Development Minister Lalruatkima chuan Zirtawpni kalta khan District leh RD Block hrang hranga thawktu official te virtual meeting a neihpui a, ni za inhlawhna kalpui dan thlirho a ni.

He hunah hian District hrang hranga RD Department official sawm bikte an tel kim a, ni 100 inhlawhna District hrang hrang leh RD Block hrang hrang ten an kalpui dan thlirho a ni a. MGNREGS ah May leh June, 2021 a thawh dan tur leh hmalak dan tur sawiho niin, MGNREGS hnuaia tuichhe paihna siamthat leh changkang leh awmze nei zawk tuichhe paih kalpui dan tur pawh presentation nena enho leh sawiho niin, State dang tih dante zir  a ni  bawk. Minister chuan a tul anga hma lak a duhthu sawiin, faina chungchangah pawh Mizo mipuiten  hmasawnna tam tak kan nei zel chu lawmawm a tih thu a sawi.

District hrang hranga ruahtui khawl (Jal Shakti Abhiyan - Catch the Rain) pawimawhzia inzirtirna leh hmalak dan report ngaihthlak a ni a, hmalak a tulna te leh hmalak zel dan tur pawh sawiho a ni. MGNREGS hnuaia Amrit Mahotsav Weekly Activities, India ramin Independent a hmuh champha vawi 75-na den chhena kum 2022 thleng kar khat zela hmalakna tur Central sawrkarin a rawn duan hrang hrang te a RD Department hma lak dan sawiho a ni bawk.

He meeting ah hian RD Department leh Department dang ten thawhhona an neih (Convergence) hmalakna hrang hrang pawh sawiho leh enho a ni a, a theih anga chaka hmalak a tul thu leh ruahmanna siam ang ang te bawhzui nghal char char a ngaih thu sawi a ni. He Convergence-ah hian department hrang hrang telin, chung zingah chuan PHE, Agriculture, Horticulture, AH&Vety Department te pawh an tel a ni.

Meeting ah hian District hrang hrangin harsatna an neih leh hmalakna atana tul leh pawimawh an tihte sawiho a ni. RD Minister chuan Department official theihtawp chhuahtute chungah lawmthu a sawi.