Aizawl August 25, 2023: Vawiin khan Mizoram New Capital Complex (MINECO) Building – I kawtah kum 2 chhung India in Zalenna Kum 75-na champha phak puala lawmna a kalpui tawh, Azadi Ka Amrit Mahotsav kharna atana Campaign, Meri Maati, Mera Desh (Ka leilung, Ka ram) State Level Program chu neih a ni a. He hunah hian Rural Development Minister Lalruatkima chu khuallian a ni.

Lalruatkimachuan India in zalenna champha phak kum 75-na lawmna atan Azadi ka Amrit Mahotsav(AKAM) kum 2 a kalpui tak hnukharna pualin ‘Ka Leilung, Ka Ram’ tih campaign chu hlawhtling takin Mizoramah kalpui a ni a ti. Zalenna hlut zia leh zalenna sualtute an ngaihlutzia te sawiin zalenna sualtute zahnna chibai a buk a. India ram a lo ropui zual zelna atan Mizoram mipuite chu theih tawp chhuah chhunzawm turin a sawm nghal bawk.

Inlawmna thu sawitu, Chief Secretary Dr Renu Sharma chuan Central Sawrkar hmalakna te tha takin Mizoram chuan a thlawp thin nia sawiin Har Ghar Tiranga Campaign pawh Mizoramah chuan a hlawhtling hle a ni tih a sawi.

Meri Maati, Mera Desh hi August 9, 2023 atang khan Mizoramah kalpui tan a ni a. He campaign hi Thingtlangah te, khawpui te deuh ah te, block level leh district level anga kalpui a ni a. Sports & Youth Services Department chu Nodal Department niin BDO te, SDO te, Bawrhsap te, Forest Department official leh Official dang te nen an thawk ho a. Campaign hun chhung hian Zalenna sualtute leh ram tana nunna chan te zawnchhuah hna te, heng mite puala program buatsaih te, hriatrengna lung phun te bakah thing tiak tam tak phun a ni.