UEFA club in elna lian pahnih Champions League leh Europa League champion ten an khelh thin Super Cup hi chu nizan khan Champions League champion Real Madrid leh Europa league champion Frankfurt ten khelin 2-0 in Real an chak.

Helsinki hmuna khelhah hian Ballon d'Or beiseitu Karim Benzema a chetha leh a, minute 65 naah Vinícius Júnior-a siam sak hmangin goal a khunga, he goal hi European champions Real Madrid tan a goal 324 niin goal 450 thuna record siam mektu Cristiano Ronaldo chiah a la phak lo. 

Champions League-a Liverpool hnehtu Carlo Ancelotti-a pawlte hian inkhelh chhungin ball an chang tam zawk a, ball 58% changin shot pawh Frankfurt vawi 7 shot let lai shot an nei. Inkhelh tan atanga minute 37-naah David Alaba chuan hmahruaina goal a khung. He goal hi Casemiro-a siam sak niin Frankfurt goalkeeper Kevin Trapp an rep nalh hle. 

Second half-ah Real goal hnihna Benzema'n a thun ve leh a, hun tawp thlengin goal dang a luh belh tawh lovin 2-0 Real an chak a, Super Cup an vawi nga chawina a ni. Frankfurt erawh Super Cup an khelh vawi khatna niin an chak zo ta lo thung. 

Karim Benzema hian Real Madrid tan game 610-ah goal 324 a thun tawh a, season liam ta khan Benzema hian Champions League leh La Liga-ah Real a champion pui a,game 46 khelhah goal 44 zet a thun a, Ballon d'Or award dawng thei tur zingah a hming a langsar viauin a rinawm.