ZALEN Dec. 8, 2025: Tunhnaia Indigo thlawhtheihna engemawzat khaihlak avanga khualzin tam takin harsatna an tawh tihziaawm nan Northeast Frontier Railway chuan Sairang leh Guwahati inkara tlan rel-ah coach pahnih a dah belh a, kar kalta nilaini atang khan special train pahnih a tlan tir bawk.

Northeast Frontier Railway chuan tunhnaia khualzin phur thlawhtheihna thlawk tur tam tak khaihlak avanga khualzin an pun avangin December ni 6 atang khan Guwahati-Sairang Express-ah coach pahnih AC leh Sleeper a dah belh a, December ni 7 atangin Sairang - Guwahati Express ah coach pahnih AC leh Sleeper dah belh lehin heng coach an dah belh te hi dah belh hlen tur nilovin khualzinte tana a remchan zawkna tura an dah lailawk a nih thu an sawi bawk.

Hei bakah hian AC 3 Tier coach pahnih, Sleeper class coach 10 leh GSLR coach 2, a vaiin coach 14 awmna Special train chu tun thla December ni 11, Ningani khian Nagaland khawpui pakhat Dimapur atanga Sairang thleng tlan tir a ni dawn a, December ni 12, Zirtawpni khian Sairang atanga Guwahati thleng tlan tir a ni bawk ang.

NFR thuneitute chuan he an ruahmanna siam hian khualzinte an ngaihpawimawh zia a lantir bakah thlasik laiin hmarchhak state hrang hrang Mizoram, Assam, Meghalaya, leh Nagaland-ah te khualzin an pun chhoh avangin coach leh special train an dah belhna hian tualchhung mite leh a tlawhtute tan hlawkna a thlen ngei an rin thu an sawi a ni.

#ZalenNews