ZALEN August 24, 2023 : BJP Mizoram State President Vanlalhmuaka chuan Sairang Kurung luia Rêl kawng lei dawh mek chim chu a hmunah tlawhin, a thil hmuh dan te Union Minister of Railways Ashwini Vaishnaw a hriattir a, chhiatna thlen dan chhui chiang nghal turin a hrilh. Union Minister hian chhiat tawhna hmun rawn tlawh thuai a tiam.

Vanlalhmuaka chuan Sairanga Railway lei dawh mek chim thu hriat a nih ve leh a hmun an pan nghal a. A hmun an thlen hian a thil hmuh dan chu Union Railways Minister Ashwini Vaishnaw chu phone-in a hrilh nghal a, lei dawh hna kal meka chet sualna thleng chu chhui chian a ngaih thu leh Railway Minister chu chhiatna thlenna hmun a rang lama tlawh turin a hrilh a. 

Chhiat tawhna hmunah hian duh anga signal a awm that loh avangin Union Minister chuan nizan khan Hmuaka chu rawn be leh in, chhiat tawhna pawi a tih thu leh, a rang lama an chhiat tawh chhan chhui a nih tur thu te, a rang thei ang bera chhiat tawhna hmun tlawh a tum thu a rawn hrilh a, State President-in a hmuna a zuk tlawh avanga a lawm thu a hrilh bawk a ni.

Hmuaka chuan he lei dawh chim avang hian Railway hna thawh kal mek chu ti khawtlai phah lova hna chhunzawm a tul thu leh, chhiat tawhna avanga thihna tâwk chhungte leh hliam tuarte ngaihsakna kawnga rang taka hma la turin Railways Minister chu a lo hrilh bawk a ni.