Aizawl January 14, 2024 : August ni, 2023 zing dar 9:30 vela Bairabi-Sairang rel kawng siam meka lei no 196, Sairang zero point bula chim chhan chhuitu High Level Committee chuan an thil chhuina report chu Railway Board hnenah an thehlut tawh a; mahse, lei chim chhan chiah erawh puanzar a la ni lo.

Lei chim chhan chhui tur hian Ministry of Railways chuan member pali awmna High Level Committee a din a, heng mite hi BP Awasthi, PED-II, RSDO chuan hovin mithiam dang pathum Dr. Dipti Ranjan Sahoo, Prof. SH Agarwal leh Sandeep Sharma te an ni a. Committee member te hian September 2, 2023 khan lei chimna hmun hi tlawhin thil awmdan an enfiah a ni.

He chhiatna thlengah hian mi 23 thiin pathumin hliam an tuar a, thi leh hliamte hi West Bengal state mi leh sa vek an ni. Zalen zawhna chhangin Railway Consultant R.Hrangtawna chuan mitthite hi sawrkar laipui chuan Rs nuai 10 theuh zangnadawmna a pe a, hei bakah hian company leh insurance atanga an hmuh bakah an chenna, West Bengal sawrkarin ralna a pe bawk a. Mitthite hian a vaiin Rs nuai 20 chuang an dawng theuh niin a sawi.

Lei chim ta chu engtia hmalak zui zel nge tum a ni tih zawhna chhangin R. Hrangtawna chuan, "Lei chimna a ban pakhat hi a chung lam a awn deuh avangin eng emaw chen chu thiaha siam that a ngai dawn a. Hei bakah hian thir chim ho hi chu hman nawn chi a nih dawn loh avangin a thara thlak a ngai dawn a. Hun reilo teah hna tan theih beisei a ni," a ti.

Sairang zero point bula rel kawng lei dawh chim hi ABCI-BBJ Joint Venture siam a niin he lei dawh lai chim lai hian hnathawk 26 an awm a, mitthi 23 awmin, hliam tuar pathum an awm a ni.

Lei dawh lai chim hnu hian mitthi ruang 17-te hi hmuh nghal an ni a, a tuk ni 24.08.2023 (Ningani) chhunah ruang pali dang hmuh leh niin, ni 25.08.2023 (Zirtawpni) khan ruang pakhat hmuha lakchhuah kim a ni.