Bairabi-Sairang inkar rel kawng siam mekah compensation chu a la turte hnenah pek vek tawh ni mah se, hemi in a ken tel ‘Land Valuation’ atan thenkhat chuan pawisa an la leh tawh a, hetih lai hian land valuation behchhana pass lem hralh an awm mek avangin Bairabi to Sairang Railway Effected Land Owners Association chuan mipuite fimkhur turin an ngen. Association Treasurer Zoramchhuana hnen atanga kan palai thundawn danin Land Value hi ukil 8 in an buaipui a, hemi pawisa la vek tawh thenkhatin an pass chu land value la lak lohna anga sawiin an hralh thu leh hetiang thil thleng hi pawi an tihthu a sawi. “Land value lak vek tawhna te, hming awm miah lo, a lemte lei/hralh a awm tih hriat a ni a, hetianga ram pass lo in leisak awm hi a pawi hle,” a ti. Hei bakah rel kawngin a tihchhiat tur enfiaha Revenue deptt.-in assessment an siam lai pawha tel lo pass zuar an awm tih a sawi bawk, “Rel kawngin a sut buai loh tur hmun lo zuar an awm a, a hmun hrechiang lo thenkhatin man to tak takin an lei tih hriat a ni. Helai hi Association chuan kan hriat vek avangin land value beiseia pass lei duh chuan kan hriatpuina seal tel ngei chauh lei se, pawisa an paihthlawn tur tam tak kan venpui thei ang,” tiin a sawi a ni. Zoramchhuana chuan pass lem lei thu-ah mipuite him zawknan land value lo lei tawh zawng zawngte chu ‘power of attorney’-in leina lehkha a pek leh voter ID xerox nen a rang lamin Association-ah thehlut a, enfiah nise an duh a, an buaina pawh tawngka-in Kolasib bawrhsap hnenah pawh an thlen tawh tih a sawi. Hetih lai hian pass leitu hi mi 35 vel chu an hre thei tawh a, an zinga mi 15 chu an bepawp tawh tih a sawi. Pass leitu zingah hian Kolasib mi an tam hle a, Aizawl lamah pawh thahnem tak an awm an rin thu an sawi laiin hetianga pass hralh thin hi pahnih chu an hre tawh a, an hriat chian pakhat chu Kolasib police-ah case siamsak turin ngen mah se, awmzia a nei lo tih an sawi. Association hruaitute chuan pass lem lei leh hemi kaihnawiha land value lak lohna tur ram leitute an nih loh avangin hmalak tak tak a har tih an sawi a, “Kan hriat meuh chuan hmalak kan tum a; mahse, a leitute leh a hralhtute an lo inrem leh tawh thin si a, huatthlala viau mah se hmalak a har,” tiin tuna an hnena inhriattir tura an ngenna hi pass leituten an zawm that chuan na zawka hmalak theih nan FIR an thehlut hmak hmak tawh dawn tih an sawi a ni.