August 25, 2023; Bairabi leh Sairang inkar rel kawng tur, Kurung lui-a dawh mek chima thi mi 23 te ruang chu hmuh kim an ni tawh. 

Vawiin chawhnu khan ruang pakhat lakchhuah leh niin, tihian ruang zawng zawng lakchhuah kim ni a hriat a ni. Tarlan tawh angin, he chhiatna hi August ni 23, chawhma dar 10 rik hma hretah a thleng a, relkawng siam hnathawktu mi 26 zinga 23 an thi a, midang 3 chhanchhuah an ni a, ngaihtuahawm lutuk an awm lo.

Mitthite chu West Bengal mi, mipa vek an ni a, tawih thei lo tura buatsaih (embalm) a nih hnuah Railways thuneitute hnenah an khuaa thawn turin hlan a ni ang.

Ministry of Railways chuan he chhiatna thleng chhuitu tur member 4 awmna High Level Committee chu nimin khan a din a, thla khat chhung hun pe in, hemi chhung a thil thlen dan chhui zo tura tih an ni.