August 23, 2023; Tukin zing dar 10 vel a Bairabi atanga Sihhmui-a rel luhna kawng tur Lei dawh chimin mi 28 a chimpui a, he thu ziahlai chawhnu dar 2 thleng hian mi 19 an thi tih hriat chian tawh niin, mi 2 in hliam an tuar a, midang 7 te chin hriat an la ni lo. Lei chim ah hian Mizo an tello nia thudawn a ni. 

Sairang atanga ZALEN thudawn danin, helai hmun leidawh enkawltu manager sawi danin, leidawh chim hian mi 28 a chimpui a, a chimpui zat hi chiang tak a sawi mai a harsa a, manager pawh hian mi 26 zawk pawh an ni thei niin a sawi. Tun thlengin mi 17 ruang lak chhuah tawh niin, midang pahnih ruang tang lak chhuah tum mek a ni a, hliam tuar 2 lakchhuah tawh ni bawkin, midang 7 ve te erawh an chin hriat a la ni lo.

Leidawh mek a hnathawkte hi a hnuai lam metre 40 vel zet a sangah leichim hian a tlakpui a, ruang hmuh tawhte pawh hi an taksa chhe tak tak te pawh an awm nual nia thudawn a ni.

Ruang lakchhuah a piangte hi Sairang Dinthar YMA Hall ah lak zel niin, Aizawl veng hrang hrang YMA branch ten kuang an pe khawm mek nia thudawn a ni bawk.

Chhiatna thlenna hmun hi Aizawl DC atangin Disaster Management team te pawh a hmunah an thleng tawh a, Sairang huamchhung atangin mi tlawmngai thahnemtak chhiatna thlenna hmunah hian an thleng tawh bawk.