Nikum YMA General Conference, 2015 Bairabi-a neih in “Remna Ni June ni 30 hi mipui nawlpuiin a huhova lung- rual taka hman a nih theih nan Sawrkar-ah thlen ni rawh se” an tih bawhzuiin Central YMA chuan hma a la chho a, Political party te nen inkawmin an inkawmna hian rah tha a chhuah a, kumin atang chuan Remna Ni hi a huhovin lawm tum a ni ta a ni. Remna Ni lawmna atana thil tulte buapui turin Central YMA kaihhruaiin Celebration Organising Committee lian tak din a ni a, YMA lamin a hnarkaitu nihna changin Political Party hrang hrang aiawhte bakah Mizoram pum huap pawl lian tak tak aiawhte leh rampum huap mi lar te an tel bawk a, kumin atang chuan lungrual taka Mizo mipui ten kan hman ho theih a beisei ngam tawh ang. Kumin 2016 hi Remna Ni champha vawi 30-na 'Pearl Jubilee' a ni bawk nen a huhova lungrual taka kan lawm tur hi mellung pawimawh tak a ni bawk. Remna Ni Celebration Organising Committee chuan kumin Remna Ni lawmna pui ber ah hian Prime Minister Narendra Modi chu khuallian atan sawm an tum a, Aizawl ah chuan Lammual ah hman tumin ruahmanna kalpui a ni mek a. Aizawl mai bakah district khawpui leh khawpui lian dangah te pawh lawm tum a ni bawk hi thil danglam leh lawmawm tak a ni. Mizoram sawrkar pawh a inhawng a, sum pawh thahnem tham tak thawh a tum a. Remna Ni lawmna pui ber Aizawl a hman atan cheng nuai 5 leh district khawpui a hman turin nuai 3 theuh a remti tih han hriat te hian sawrkarin Remna a ngaih pawimawhzia leh a hlutzia a tilang chiang hle a ni. Remna hlutzia hi thangthar te hian an hrechiang tawklo hle niin a lang a. Rambuai hunlaia Mizo mipui te tawrhna nasatzia te hre ve phalo tan chuan Remna Ni lawm tih pawh hian awmzia a nei thui lo viau thei. Kan thenawm state Manipur, Assam leh Tripura te han ngaihtuah ila mipui an thlamuan loh zia te, bomb puak, inkahna tamzia te hrechiang tan chauh remna hlutzia hi a chiang thei awm e. Democracy ke pen mek kan thenawm Myanmar ram ah te sipai rorelna avanga mipui hrehawm tawrh zozaite hrechiangtu tan chuan Remna Ni hian awmzia a nei deuh ngei ang. Hetih laia thil hriat hrehawm deuh erawhchu Mizoram in Remna a neih chungchangah hian Political Party te nasa taka an inchirhtheh thin leh inpuhmawhna a awm thin hi a ni. Remna kan duh vangin Mizo mipui ten mahni theihna zawn theuhah hna kan thawk a. Zirlai pawl ten 'Bandh' te siamin Kohhran ten Pathian hnenah an dil a, Political party ten nasa takin an thawk bawk a. Remna atan mahni theihna zawn zawnah theihtawp kan chhuah tlang vek tih i pawm ang u. Thilti thei deuhin an thawk nasa deuh a, thilti theilo deuhin an thawk tlem deuh a, mahse theihtawp kan chhuah tlang vek erawh thil lawmawm tak a ni. Remna hi a hlu a, ropui taka lawm hi a phu ngawih ngawih. Hun kal tawh ah chuan tih dikloh palh te pawh kan nei mai thei, chung thilte chu theihnghilhin Remna Ni lo thleng tur hian unau kan nihna thlen lehzual se; kan hliam hluite dama hmalam min thlirtirtu leh hmasawnna thlentu atan Mizo mipuite hian hmang ang u.