Aizawl June 30, 2022 : Remna Ni pualin vawiin khan Congress party chuan hun an hmang a, Inremna ziah a nih lai, khatihlaia Mizoram Chief Minister leh an party president hlui ni bawk Lal Thanhawla chawimawina hun, Golden Hall, Congress Bhavan-ah an hmang.

MPYCC te hmalakna a hun hmanah hian Lal Thanhawla chuan Mizoram buai tan dan leh thil thlen dan a sawi a, zanlai dar 12-a inkah tan tura engkim ruahman fel vek a nih tawh laiin, MNF President Laldenga berin inkah hma lawk, zan dar 11 velah thulh leh mai a duh nia sawiin, Mahse, Sangau leh Tuipang lam te hrilh theih anih tawh loh avangin loh theih lohin inkahna a thleng ta a, ram a buai zui ta niin a sawi. 

Lal Thanhawla chuan, "Remna leh muanna a awm theih nan khan lalna kiantu neih a ngai tlat a. A hma a inremna lo siam tum te pawh kiantu an awm theih loh vanga hlawhtling thei lo a ni. Chuvangin, remna leh muanna a thlen theih nan lalthutthleng kan kian ta mai a ni. Remna leh muanna a awm dawn tih a chian hnuah khan thangthat lak tum an tam hle mai a. Kei pawh bang duh tak tak lo ang hiala puh ka ni. Mahse, a hma a ka sawi tawh, remna leh muanna awmna tur anih chuan minute khat pawh ka in ngaihtuah lo ang ka lo tih tawh ang khan nihna ken kha ka pawiti reng reng lo. Amaherawhchu, khatih lai khan bang ta ngawt ila, President rule-ah kan awm mai a ngai dawn si a, a hmaa President rule-a kan awm fo tawh avangin a hrehawm zia kan hrechiang a, engkim ti fel hmasa lo chuan ban ngawt chi a ni lo a ni," a ti.

Lalduhoma leh returnee chungchang sawiin, "London a awm Laldenga zu ko haw tura khan Lalduhoma kha Passport nei remchang a nih avanga tir kan ni a, Indira Gandhi tirh a ni lo. Lal Thanhawla te, CL Ruala te leh Congress party hruaitute tirh a ni. Return ticket nen lama kan pek bakah pocket money cheng sing 3 nge sing 5 ka chiang ta lo, kan pe bawk. Congress Party hian remna leh muanna a ngai pawimawh a, lal thutthleng kan ken mai bakah ram mu lo haw, chenna tur nei lote tan kan In sak te pawh kan ti ruak a ni", a ti. 

He hunah hian C. Chawngkunga, Ex Minister pawhin thu sawiin, "Hun rei tak Remna leh muanna atana  Lal Thanhawla inpekna hi a rei telh telh ang a, kan hlut telh telh dawn a ni," a ti bawk.