Aizawl : Vawiin khan Mizo Infiammi zinga India team aiawh Oympic a tel pahnihna Lalremsiami chu Lengpui Airport ah hmuah a ni a, he hunah hian Mizoram sawrkar hruaitute bakah sports pawl hrang hrang ten an lo dawngsawng.

He hunah hian Lalremsiami chuan Lengpui Airport-ah Mizoram a rawn thleng a. Women’s Field Hockey Semi Final, Summer Olympics 2020, Tokyo a khelh hnua Mizoram a rawn chuankai lehna denchhen hian Mizoram sawrkar chuan 0fficial reception hun a lo buatsaih sak a ni.

Lalremsiami hian Lengpui Airport a rawn thlen hian Mizoram Hockey Player te chuan lawmpuina chibai an lo buk hmasa berin a darah Tawlhlopuan an lo bat. NCC, Hrangbana College, a lehkha zirna college, ten Press Conference Hall-ah an hruai lut a. Helai hmunah hian Minister te leh mi pawimawh ten lawmpuina pangpar leh thilpek nen an lo dawngsawng a. Hemi hnuah hian Chanchinbumite nena inkawmna hun an hmang chhunzawm a ni.

Chanchinbumite a hmachhawn hmain thusawina hun a nei a. Thinglung takin Mizoram mipuite chungah amah an thlawp tlat avang leh an lo tawngtaisak avangin lawmthu a sawi.

Chanchin thehdarhtu ten an kawmnaah hian, Remsiami chuan tuna sawrkar hna an pe chu lawmthu a sawi rualin, bul a tan chiah tih a sawi a, Railways lama hna a thawh hnuah Mizoram sawrkarin hna an pek chu a lawm zia sawi lang. Hna a neih tawh avangin a chhungte tan harsatna a awm tawh loh turah a ngai a, tunah chuan a chhungte nitin mamawh ngaihtuah ngai lova, hahdam taka Hockey a khelh tur thu leh atan thil hlu tak a ni tih a sawi. Hna an pek chu a atan a hlu tih leh a hna neih sa leh Mizoram sawrkarn hna an pekah duh thlang turin, an chhungkua  chu an la inrawn loh thu a sawi. 

"India team captain I ni thei ang em?" tih press lam zawhna chu, sawi theih a neih loh thu a sawi a, a senior te chu an tan a hlut thu leh a kal kawnga kaihruaitu a nih thu a sawi lang. Chi leh chi inkarah harsatna a tawh loh thu uar takin a sawi a, tawng thiam lova India team a lut a nih a zep lo a, an team senior team ten thui taka an kaihhruai thu leh an tana a hlut thu a sawi. Thenzawl lama a khawsak laia Mizo-Hindi-English translation bu an an pek chu tawng a thiamna atana a tangkaipui thu a sawi bawk.

Olympic semi finalist hi R. Lalzirliana, Minister, Power & Electricity,etc., K. Lalrinliana, Minister of State, Food, Civil Supplies & Consumer Affairs, etc., Sports Department official te, MSSC hruaituten Lengpu-ah hian an lo dawng sawng a, , official dang te bakah Robert Romawia Royte, Minister of State, Sports & Youth Services,etc., leh official thenkhat ten Delhi atangin an rawn tawiawm chho bawk a ni.