Aizawl: Nimin zing khan Republic Vengthlang Sanitation Committee chuan an veng chhunga Junior Sanitation Volunteer-te hnenah khawlai tihfainaa an hak tur jersey an sem a, kum kaltaa hnatlang thawk thate chawi-mawina leh lawmman semna hun an hmang bawk.

Republic Vengthlang ah hian Junior Sanitation Volunteer mi 88 an awm a, thla tin vawi 2 (Inrinni)-ah an hnatlang thin a ni. Anni bakah puitling sanitaion volunteer mi 34 an awmin, kartin Thawhlehni tuk apiangin an hnatlang thin bawk a ni.

Puitling leh naupangte hian form (jersey) hi an nei hrang ve ve a ni, an jersey hak tur hi Local Council leh mi mal inphalte thawhkhawm atanga an lei a ni.

Republic Vengthlang hian kum 5 chhung a zawnin vengfai lawmman an lo dawng tawh a, tunah hian Aizawl khaw chhunga veng fai ber lawmman dawngtu an ni mek a ni.