Aizawl: RT-PCR result nghah laia mahni duh thu a Rapid Antigen Test (RAgT) hmanga lo in test nawn an awm thin a, hei vang hian COVID-19 Positive result in thuah (double case) a awm phah a; hei hian COVID-19 result buatsaih leh tihchhuah kawngah harsatna lian tak a siam avangin result nghak lai te chu pawn chhuak lo turin ngen.

Dr. Pachuau Lalmalsawma, State Nodal Officer, COVID-19 chuan thuchhuah siamin tun hnaiah COVID-19 dinhmun hre tura RT-PCR sample lak hnu leh result nghah laia mahni duh thu a Rapid Antigen Test (RAgT) hmanga lo in test nawn an awm thin tih sawiin mi pakhat atangin COVID-19 Positive result in thuah (double case) a awm phah thin a; hei hian COVID-19 result buatsaih leh tihchhuah kawngah harsatna lian tak a siam avangin RT-PCR result nghak laite chu pawn chhuak lo tur leh result an hriat hma chuan sample test dang ti rih lo turin a ngen a. Mahse RT-PCR  test result nghak lai, COVID-19 symptom neite erawh chu inthlahrung lova mahni awmna veng Task Force te hnenah in hriattir vat turin a ngen.

Mipui hnena ngenna a siamah Dr. Pachuau Lalmalsawma chuan mahni bul hnai, hnathawhna leh hmun danga COVID-19  hri kai an awmin Primary High Risk Contact, COVID-19 kai ve mai thei dinhmuna ding ten in lama chenpui leh hnathawhpuite himna turin mahni veng Task Force leh Sawrkar Contact Tracing Team atanga zawhna an dawnte huaisen tak leh zep nei lova lo chhanga, tha taka lo thawhpui thin turin a ngen a. India rama COVID-19 thawhhnihna (Second Wave) kal mekah  state dang atanga Mizorama lo haw turte chu mahni awmna leh haw kawngah theih tawpa fimkhur tura chahin mahni awmna bula mite theuh pawh COVID-19 positive anga ngai  khawpa Covid Appropriate Behaviour neia fimkhurna kawng nasa lehzuala zawh turin a ngen bawk.