ZALEN June 23, 2025; Bible lehlin kawnga mi tangkai Rev.Dr. H. Vanlalauva (77) Durtlang Leitan chu cancer vangin nizan dar 8:48 khan a boral a, vawiinah vui a ni ang.

Rev. Dr. H. Vanlalauva hi pumpui cancer niin inrinni khan Ebenezer damdawiinah zai a ni a, septicemia a lo nei bawk a, a tuar chhuak zo ta lo a ni. A ruang hi nizanah tlaivarpui anih hnu in vawiin chawhma dar 11- ah an chenna inah thlahna hun neih a ni anga, chawhnu dar 1-ah Leitan South Kohhran biak in- ah synod moderator in a vui ang.

Rev. Dr. H. Vanlalauva hi November ni 24, 1948-ah Leithum khua ah piang a. Kum 1975-a Gauhati University atanga MA a zawh hnuah Hrangchhuana High School, Aizawl-a headmaster hmasaber a nih laiin Pathian thu- zir tura kohna dawngin, a hna chu a bansan a. Kum 1978-ah UTC, Bangalore-ah BD a zir a, 1981-ah zovin, Aizawl Theological College (ATC)-ah zirtirtu hna a thawk zui nghal a. Mizoram Synod hnuaiah Pro. Pastor-in Chaltlang bial, Dawrpui vengthar bial leh Bungkawn bialah a awm tawh a. UTC, Bangalore atanga M.Th a zawh leh hnu kum 1986-ah Pastor atana nemngheh a ni.

Kum 1990-ah D.Th zir lehin, 1995-ah a zova. ATC-ah kum 2007 thleng thawkin, kum 1999-2007 ah Principal a ni a. Kum 2007-2008 ah Mizoram Synod Moderator niin a pension a ni. Mizoram Synod atanga a pension hnu ah pawh Pathian thu zirna lamah chanvo pawimawh tak tak achelh zui a. Bible Society of India, Aizawl Auxiliary President a ni zui a. Chief Translator leh Executive member a ni bawk.

A nupui Lallianpuii chuan July ni 6, 2016 khan a lo boral san tawh a. Fapa pahnih - David H. Lalthangliana (Kolasib SP), Rev. Dr. Andrew H. Laltlanliana leh fanu Rebecca Lalrinmawii te an nei a ni.

#ZalenNews