Aizawl July 4, 2022 : ZPM chuan Headquarters Office-ah vawiin khan chhung inkhawm an hmang a, President Lalliansawta chuan thu sawiin, an party chhunga boruak fuh lo chang awm thin mah se, an inpumkhatna siamtu leh an chak na hnar niin a sawi. 

Lalliansawta chuan, "ZPM hi kum 5 vel kaltaah khan pawl hrang hrang infinkhawmin kan din a, ze hrang hrang nei, pawl hrang hrangte zaikhatah luangin harsatna eng eng emaw te chu tawk ve thin mah ila, vawiin thlengin lungrual takin ke kan la pen zel a ni. Chhungkuaah pawh fate rilru leh ngaihtuahna a thuhmun vek ngai lova, nu leh pa ngaihdan pawh a rual loh chang a awm fo thin. Mahse, chhungkua kan nih miau avangin kan inpumkhat tlat thin a, chu chuan zahawmna leh chakna a keng a, mi hrang hrang, thiam leh theihna inchen lo tak tak, chitin fuankhawm kan nih miau avangin, eng emaw changa han rik deuh nak nak lai nei thin mah ila, hei hi kan inpumkhatna siamtu, kan chakna hnar a ni a, tunah pawh sawrkarna siam ngei tumin chak takin kan kal zel a, party thangduang leh chawrno chho mek zel, a than zelna tura tui petu ni vek turin party mipuite ka chah duh a ni,” a ti. 

Sawta chuan, “Mi tam takin kum 2023 inthlanah chuan ZPM-in sawrkarna a chan ve ngei an ring tawh a, mahse hnehna changa tlang chhip thleng tur chuan kawng thu tak lawnna tur kan nei a, kawng kan insahchawp a ngai. Kum 2023 Election hmachhawn tumin party a insingsa tan mek a, tunah hian Search Committee pawh dinfelin hma lak chhoh mek zel a ni,” a ti bawk.