Aizawl September 4, 2023: School Education Minister Lalchhandama Ralte chuan A.R. Ground-ah Teachers’ Day 2023, Vawi 62 lawmna pual exhibition football match programme chu khuallian niin a hmanpui a, 'Ro min rel sak ang che' tih hla Rokunga phuah zah tak chunga sa thin turin kalkhawmte a chah.

Khuallian chuan Mizo hnam hla "Ro min rel sak ang che" tih chu zah taka sa thin tura chahin hnam hla sak apiangin awmna hmunah ding chungin zah tak chunga sa thin tur ni a ti. Ram leh hnam zahpui lova, culture-te zirlaite'n uar lehzuala an chhawmnun a pawimawh a ti. Zirtirtute Ni chu state pum huap programme siam a that rualin zirlaite'n anmahni school theuha zirtirtute chawimawna function buatsaih an duh thin avangin State Level Working Committee (SLWC) chuan mahni remchan dan anga zirtirtute ni hi hman tura ruahmanna siam a ni a ti a. SLWC ruahmanna bawhzuia vawiin exhibition football match buatsaih a ni chu lawmawm tiin duhsakna a hlan nghal a ni.

Teachers' Day 2023 pual exhibition football match-ah hian Government school 22 leh Private school 32 aiawh zirtirtute'n an khel a ni. Exhibition hmasa zawka hmeichhiate'n 15+5+15 minutes an khel a. Match 2na hi mipain 25+5+25 minutes-in an khel bawk a ni. Hmeichhe exhibition-ah hian Mizoram Independent School Association (MISA) leh Mizoram Government School ten an khel a, MISA hian 1-0 -in hnehna an chang. Mipa exhibition match-ah hun pangngaia an inhneh tawk avangin penalty an pet a, MISA te Government zitirtute an hneh bawk a ni.