Aizawl: MPCC chuan MNF sawrkar-a Deputy Chief Minister thuneihna kawl tu leh Minister dang te thal theih loh thal thei rengtu chu Robert Romawia Royte niin an sawi.

Nimin khan Aizawl Press Club-ah thuthar thehdarhtute kawmin MPCC Media Department chuan MNF kaihhruai sawrkarah Deputy Chief Minister chu Tawnluia ni mahse Minister zingah Robert Romawia Royte chu Chief Minister hnenah a tlatlum hle niin an sawi a. January 24, 2019 khan Sports Minister Robert Romawia Royte chuan Chief Minister hnenah lehkha ziakin, UD&PA Department hnuaia sum hman bang awm atangin Khawzawl Football ground leh Zemabawk Football ground siam turin a rawt a, Chief Minister chuan lo remti in project pahnih siamna atan hian nuai 700 ve ve, a vaiin nuai 1,400 dah a ni ta niin an sawi.

MPCC chuan, “UD & PA Department hi Deputy Chief Minister Tawnluia chan a ni a, a department sum vaibelchhe 14 zet Minister dangin a hmanna tur an relsak thei hi a mak hle a. High School Field, Zarkawt-a UD & PA pawisa hmanga Football field chhawng siam tur chungchangah pawh a changtu Minister Tawnluia hming an tarlang duh miah lo te hi thil mak tak a ni,” an ti a.

“Robert Romawia Royte leh CM nen an inkarah hian hnungthak inhiahsak tawnna a awm ngei ang tih MPCC chuan kan ring tlat a ni,” an ti bawk.