Nov. 21 atanga Dec. 18 thleng awh tur Qatar FIFA World Cup-ah hian football khawvela hming dai tawh lo tur pahnih Lionel Messi leh Cristiano Ronaldo te hmel kan hmu dawn a, anni pahnih hi kum lamah upa ve deuh tawhin kumin World Cup bak hi World Cup an khel tawhin a rinawm loh. Heng player pahnihte thiamna hi sawi nep rual a ni lova, tun hnai Ballon d'Or an sem chhuah 13 zinga 12 chu anni pahnih hian an insem vek a ni. 

Kumin World Cup hi Messi tan a World Cup khelh tumngana a ni tawh dawn a, 2006 khan kum 18 mi lek a nihin he tournament-ah hian telin goal a khung nghe nghe. 2014 khan Argentina chu final thlenpui mahse Germany an paltlang zo lo. Mak tak maiin Messi hian World Cup knockout match-ah goal a la thun hauh lo va, a goal thun paruk te hi group stage lama a thun vek an ni.
    November 22-a Argentina-in Saudi Arabia an hmachhawn hunah chuan Messi hian kum 35 a lo tling ve tawh dawn a, kum li hnuah chuan a khel peih tawhin a rinawm loh. 

Ronaldo pawh hian tum li World Cup khel tawhin nikum khan international-a goal khung hnem ber nihna a chelh a, mahse a ni pawh hian World Cup knockout round-ah goal ala thun bik lo. Portugal captain hian kumin hian kum 38 a tling thuak tawh dawn a, chuti chungin a taksa a la fit thain season liam ta pawh khan Manchester United tan goal 24 zet ala thun thei a ni. 

Anni pahnih tan kumin Qatar 2022 World Cup hi hnu hnung ber a ni tawh ngeiin a rinawm a, khawvel player tha ber pahnih hian FIFA World Cup-ah erawh hnuhma chhuan tham an la neih lo. Kumin World Cup-ah tu zawkin mahni ram chetthat pui zawk ang tih in zawt chungin i lo nghak phawt mai ang u.